Alfiya kampir obrazi bilan tanilgan Barno Teshaboeva tugilgan kuni
O‘zbekistonning taniqli san’atkorlaridan biri Barno Teshaboeva 14 aprel kuni 55 yoshga to‘ldi. Bu haqda Zamin.uz xabar berdi.
U ko‘pchilikka o‘zining shaxsiy qiyofasi bilan emas, balki xalq orasida mashhur bo‘lgan Alfiya kampir obrazi orqali tanilgan. Aktrisa 1971 yilda Toshkent viloyatining Chinoz tumanidagi Olmazor qishlog‘ida dunyoga kelgan.
Sakkiz farzandli oilaning oltinchi farzandi bo‘lgan Barno bolaligidanoq qiziquvchan va tasavvuri boy qiz bo‘lib shakllangan. Uning xarakteriga otasining erta vafoti va onasining tinimsiz mehnati katta ta’sir ko‘rsatgan.
Bolalik yillarida u sahna ko‘rinishlarini tuzishni va tengdoshlari bilan turli ssenariyli o‘yinlar o‘ynashni juda yaxshi ko‘rardi. Uy ishlarini bajarishdan ko‘ra, ijodiy izlanishlar va erkinlik unga ko‘proq zavq bag‘ishlagan.
Yoshligida boshidan kechirgan xavfli voqea, ya’ni anhor suviga cho‘kib ketayozgani uning hayotga bo‘lgan qarashlarini o‘zgartirgan va yashashga bo‘lgan kuchli istagini uyg‘otgan. San’at olamiga kirish yo‘li u uchun oson kechmagan.
Bir filmni tomosha qilgach, aktrisa bo‘lishga qaror qilgan va turli studiyalarga maktublar yozib, o‘z iste’dodini namoyon etishga harakat qilgan. O‘qishga kirish jarayonida uni kamsitganlar va texnikumga ham kira olmasligini aytganlar, biroq u taslim bo‘lmagan.
Uning ijodidagi eng katta muvaffaqiyat Alfiya kampir obrazi bo‘ldi. Ushbu qiyofani u hali talabalik yillarida, 18 yoshida yaratgan.
Keyinchalik mashhur Qalpoq hajviy ko‘rsatuvidagi ishtiroki tufayli bu obraz butun mamlakat miqyosida tanildi. Hatto ko‘p odamlar uni haqiqiy ismi bilan emas, balki Alfiya deb chaqira boshladilar.
Barno Teshaboeva bir necha bor bergan intervyularida ushbu holatdan afsuslanmasligini ta’kidlagan. Uning fikricha, har bir san’atkor chiroyli rollar orqali emas, balki xalq qalbiga yo‘l topgan bitta kuchli personaj orqali ham tarixda qolishi mumkin.
Hozirda aktrisa o‘z ijodiy faoliyatini davom ettirmoqda va uning yaratgan obrazlari ko‘pchilik uchun eslanib qoladi.
