Muqaddas Xoliqova ijodiy yo‘li va bolalik yillari haqida
O‘zbekiston xalq artisti Muqaddas Xoliqova 14 aprel kuni 66 yoshni qarshi oldi. Bu haqda Zamin.uz xabar berdi.
U nafaqat sahna san’atining yorqin vakili, balki tomoshabinlar qalbidan chuqur joy olgan mohir aktrisa hisoblanadi. San’atkorning hayoti va ijodiy yo‘li ko‘plab qiziqarli voqealar hamda sinovlarga boy.
1960 yil 14 aprelda Toshkent shahrida dunyoga kelgan Muqaddas Xoliqova oilada kenja farzand bo‘lib voyaga yetgan. Bolalik yillarini eslab, u o‘zini juda sho‘x va harakatchan qizaloq bo‘lganini ta’kidlaydi.
Hatto maktabda sodir etgan sho‘xliklari sababli onasi jarima to‘lagan holatlar ham bo‘lgan. Biroq u darslariga jiddiy yondashgan va fanlarni yaxshi o‘zlashtirgan.
Maktab davrida teatr to‘garagiga qatnashib, san’atga bo‘lgan ishtiyoqi ortib borgan. Bir kuni spektakl tayyorgarligi paytida maktab direktori uni darsdan chiqarib sahnaga yuborgani aktrisa taqdiridagi ilk muhim burilishlardan biri bo‘lgan.
Tengdoshlarining ba’zi masxaralari va aktrisa bo‘lolmaysan degan shubhali gaplar uning irodasini yanada mustahkamlagan. San’atkorning hayotidagi eng og‘ir sinov to‘qqiz yoshida otasidan ayrilgani bo‘lgan.
Onasi beva qolib, ikki farzandni yolg‘iz tarbiyalashga majbur bo‘ladi. Ona shaxsiy baxtidan voz kechib, farzandlarining kelajagini birinchi o‘ringa qo‘ygan.
Bu jasorat va mehr Muqaddas Xoliqova uchun hayotdagi eng ta’sirli xotiralardan biriga aylangan. Maktabni tamomlagach, u san’at institutiga hujjat topshirib, imtihonlardan muvaffaqiyatli o‘tadi.
Bu g‘alaba uni shubha qilganlarga berilgan eng yaxshi javob edi. Keyinchalik rejissyor Bahodir Yo‘ldoshevning tavsiyasi bilan teatrga kirgan san’atkor u yerda o‘z iste’dodini to‘liq namoyish etadi.
30 yildan ortiq ijodiy faoliyat davomida Muqaddas Xoliqova yuzga yaqin xarakterli obrazlarni yaratdi. Uning ishtirokidagi spektakllar yuzlab marta sahnalashtirilib, keng omma tomonidan e’tirof etildi.
Shaxsiy hayoti borasida esa u ancha kech turmush qurganini yashirmaydi. Bunga sabab sifatida san’atkorlarga nisbatan jamiyatdagi munosabatni va o‘zini tushunadigan insonni uzoq kutganini ta’kidlaydi.
