Javohir Sindorov va Bibisora Assubayeva munosabatlari muhokamaga aylandu
Kiprda bo‘lib o‘tayotgan nomzodlar turniri nafaqat sport natijalari, balki ishtirokchilarning shaxsiy munosabatlari bilan ham jamoatchilik e’tiboriga tushdi. Bu haqda Zamin.uz xabar berdi.
Xususan, O‘zbekistonlik grossmeyster Javohir Sindorov va Qozog‘iston vakili Bibisora Assubayevaning o‘zaro yaqinligi ijtimoiy tarmoqlarda keng muhokama qilinmoqda. Bibisora tomonidan e’lon qilingan suratlar muxlislar orasida ularning munosabatlari shunchaki do‘stlikdan iboratmi yoki undan yuqorimi degan savollarni keltirib chiqardi.
Ushbu vaziyatga javohir Sindorovning buvisi ham o‘z munosabatini bildirdi. Sportchining yaqini yoshlar bir-birini bolaligidanoq taniyotganini va birga shaxmat o‘ynab ulg‘ayganini ta’kidladi.
Shuningdek, u qizning onasi bilan ham tanish ekanligini aytib o‘tdi. Hozirgi kunda ular faqat do‘st bo‘lishsa-da, kelajakda munosabatlari o‘zgarishi mumkinligini va agar Javohir oila qurishni istasa, oilasi bunga to‘liq rozi ekanligini ma’lum qildi.
Buvisi yoshlarning dunyoqarashi va qiziqishlari bir-biriga juda yaqinligini ham qo‘shimcha qildi. Hozirda har ikki shaxmatchi Kiprdagi nufuzli musobaqa doirasida o‘z mahoratini namoyon etmoqda.
Javohir Sindorov turnirning yakuniy turigacha bo‘lgan bosqichlarda yuqori natija ko‘rsatib, g‘oliblikni amalda ta’minladi va jahon chempionligi uchun kurashish huquqini qo‘lga kiritdi. Bibisora Assubayeva esa o‘z guruhida yetti yarim ochko to‘plab, ikkinchi o‘rinni egallagan.
U yakuniy turda g‘alaba qozonish imkoniyatiga ega. Sportchilarning o‘zlari munosabatlari borasida hali rasmiy bayonot bermagan bo‘lsalar-da, tarmoqlardagi suratlar yosh grossmeysterlarning bir-birini doimiy qo‘llab-quvvatlayotganini ko‘rsatmoqda.
Muxlislar esa ularning ham sportda, ham shaxsiy hayotda muvaffaqiyat qozonishlarini kutishmoqda.
