Dilfuza Ismoilovaning burnidagi olmos taqinchoq sogligiga jiddiy zarar yetkazdi
Xonanda Dilfuza Ismoilova o‘zining tashqi ko‘rinishiga oid kutilmagan va yoqimsiz voqea haqida yangi intervyusida so‘zlab berdi. Bu haqda Zamin.uz xabar berdi.
San’atkorning aytishicha, u Amerika Qo‘shma Shtatlariga safar qilgan vaqtda bir ayolning burniga taqilgan chiroyli olmos taqinchoq uning e’tiborini tortgan. Shu sababli xonanda o‘zi ham shunday bezakdan foydalanib ko‘rishga qaror qilgan.
Oradan biroz vaqt o‘tgach, Dilfuza Ismoilovaga katta hajmdagi olmos sovg‘a qilingan. U ushbu taqinchoqni burniga taqdirganini ma’lum qildi.
Biroq, bu qarori kutilmagan asoratlarga olib kelgan. Vaqt o‘tishi bilan taqinchoq sababli burnida kuchli yallig‘lanish boshlangan va sog‘lig‘i yomonlashgan.
Holat og‘irlashgach, xonanda yordam so‘rab eski Toshkent tibbiyot institutiga murojaat qilishga majbur bo‘lgan. U yerda mutaxassislar tomonidan olmos taqinchoq olib tashlangan.
Dilfuza Ismoilova o‘sha paytdagi og‘riqli va qiyin vaziyatni eslab, juda qiynalganini aytdi. U o‘z holatidan iztirob chekkan holda, oynaga qarashga ham botinolmaganini va o‘sha taqinchoqni g‘azab bilan oynaga otib yuborganini qo‘shimcha qildi.
San’atkor jismoniy azoblar tufayli Allohdan kechirim so‘raganini ta’kidlab, bunday tajribalar insonni ko‘p narsaga o‘rgatishini izhor etdi.
