Dilfuza Ismoilova boylik va kibr haqida ochiq gapirdi

Mashhur komik aktrisa va xonanda Dilfuza Ismoilova yaqinda bergan intervyusida ko‘pchilikni hayratda qoldiruvchi ma’lumotlar bilan o‘rtoqlashdi. Bu haqda Zamin.uz xabar berdi.

San’atkor o‘zining shaxsiy hayoti, sog‘lig‘i va boylikka bo‘lgan munosabati haqida ochiq gapirdi. Ijodkor faoliyatining ilk davrlarida Qozog‘iston safarlaridan juda katta mablag‘ topib kelganini, Shvetsiya hamda Amerikaning ko‘plab shtatlarida gastrol qilganini esladi.

Biroq u hech qachon moddiy imkoniyatlari bilan maqtanmaganini ta’kidlab, kibrni pastkashlik belgisi deb hisoblashini aytdi. Dilfuza Ismoilova boylik tushunchasiga boshqacha yondashadi.

Uning fikricha, haqiqiy boylik ruhning xotirjamligi va yaqinlarining sog‘lig‘idir. San’atkor kelajakda nafaqat moddiy jihatdan, balki yaxshiliklari bilan ham tarixda qolishni orzu qiladi.

U to‘plagan mablag‘larini muhtojlarga ehson qilish, uysizlarga boshpana va ehtiyojmandlarga yordam berish niyatida ekanini ma’lum qildi. Xonanda ba’zi insonlar uning mehribonligidan foydalanishga urinishlaridan ranjishini bildirdi.

Ko‘pincha dabdabali to‘ylarni tashkil qilganlar san’atkorning mashhur ismini bepul xizmat ko‘rsatishi uchun ishlatmoqchi bo‘lishar ekan. Dilfuza Ismoilova bugungi darajaga yetish uchun yillar davomida tinmay mehnat qilgani va katta mablag‘ sarflaganini eslatdi.

Suhbat davomida san’atkor Amerikada sodir bo‘lgan qiziqarli voqeani ham so‘zlab berdi. Unga sovg‘a qilingan qimmatbaho brilliant tosh sog‘lig‘iga salbiy ta’sir ko‘rsatib, yallig‘lanish keltirib chiqargan ekan.

Sog‘lig‘i birinchi o‘rinda ekanini anglagan xonanda ushbu qimmatbaho toqinchoqdan voz kechgan va uni tashlab yuborganini aytdi. Shuningdek, 60 yoshga yaqinlashgan san’atkor hanuzgi muxlislarining ardog‘ida ekanini ta’kidladi.

Uning aytishicha, hali ham yosh yigitlar unga turmush qurishni taklif qilishar ekan.