Gautam Adani Osiyo qit’asining eng boy shaxsiga aylandi
Hindistondagi Adani Group konglomeratining asoschisi va rahbari Gautam Adani yana Osiyo qit’asining eng boy shaxsiga aylandi. Bu haqda Zamin.uz xabar berdi.
U bu unvoni Reliance Industries kompaniyasi rahbari Mukesh Ambanidan tortib oldi. Bu haqda ma’lumot Bloomberg Billionaires Index reytingining 17 aprel sanasidagi yangilangan ma’lumotlarida aks etdi.
Gautam Adanining umumiy boyligi 92,6 milliard dollarni tashkil etib, bu unga dunyo reytingida 19-o‘rinni egallashga, Osiyo bo‘yicha esa birinchi o‘rinda turishga imkon berdi. Mukesh Ambanining boyligi 90,8 milliard dollarga baholandi va u jahon ro‘yxatida 20-pog‘onada joy oldi.
Adanining boyligining oshishiga uning kompaniyasi aksiyalarining qadr ko‘tarilishi sabab bo‘ldi. Yil boshidan buyon Adani Groupning energetika, aeroportlar va port logistikasi sohalaridagi sho‘ba korxonalari aksiyalari qiymatining o‘sishi tufayli uning shaxsiy boyligi 8,1 milliard dollarga oshdi.
Shu bilan birga, shu davr mobaynida Ambanining boyligi 16,9 milliard dollarga kamaydi. Osiyoning eng boy odamlari ro‘yxatida uchinchi o‘rin ByteDance kompaniyasi asoschisi Chjan Iminga tegishli bo‘lib, uning boyligi 68,7 milliard dollarni tashkil etadi.
Jahon miqyosida esa Tesla va SpaceX kompaniyalari rahbari Ilon Mask ancha oldinda turibdi. Uning boyligi 656 milliard dollarga baholanmoqda.
Ikkinchi o‘rinni Google asoschilaridan biri Larri Peyj egallab, uning boyligi 286 milliard dollarni tashkil etadi. Uchinchi o‘rinda Amazon kompaniyasi asoschisi Jeff Bezos turibdi, uning boyligi 269 milliard dollarga yetadi.
Dunyoning eng badavlat odamlari orasida eng katta boylik yo‘qotgani LVMH boshqaruv raisi Bernar Arnoga tegishli bo‘lib, uning moliyaviy qiymati 44 milliard dollarga qisqardi.
