Jahongir Mirzo taxallusli shoir o'z joniga qasd qildi
Jahongir Mirzo taxallusi bilan ijod qilgan yosh shoir va yozuvchi, shuningdek, O‘zbekiston jurnalistika va ommaviy kommunikatsiyalar universiteti talabasi Jahongir Nomozov o‘z uyida vafot etgan holda topildi. Bu haqda Zamin.uz xabar berdi.
Dastlabki maʼlumotlarga ko‘ra, u o‘z joniga qasd qilgan. Bu fojiali voqea 15 aprel kuni Namangan viloyatining Pop tumanida yuz berdi.
Tuman Ichki ishlar boshqarmasi maʼlumotiga ko‘ra, voqea joyiga soat 13:00 atrofida yetib borilgan. 1997 yil 24 yanvarda tug‘ilgan Jahongir Nomozov o‘z uyidagi hammomda arqon yordamida o‘z joniga qasd qilgan.
Tuman prokuraturasi tomonidan tergovga qadar tekshiruv ishlari olib borilmoqda. Sud-tibbiy ekspertiza xulosasiga ko‘ra, o‘lim bo‘yin qismining siqilishi natijasida yuzaga kelgan mexanik nafas etish to‘silib qolishi sabab bo‘lgan.
Bo‘yindagi izdan tashqari tanada boshqa jarohatlar aniqlanmagan. Jahongir Nomozov zamonaviy o‘zbek adabiyoti vakili, shoir, tarjimon va faol jurnalist sifatida tanilgan edi.
U Turkiyaning bir adabiy jurnalida O‘zbekiston vakili sifatida ishlagan, xalqaro yozuvchilar guruhi koordinatori bo‘lgan va bir qancha xalqaro uyushmalar aʼzosi edi. Shuningdek, u “Abay” medali sohibi bo‘lgan.
Jahongir Nomozovning sheʼrlari ingliz, ozarbayjon, turk tillariga tarjima qilingan va uning asarlari xalqaro antologiyalar hamda adabiy platformalarda chop etilgan. Uning “Tush” va “Ishonch qo‘shig‘i” kabi asarlari xalqaro miqyosda tan olingan.
Bu voqea adabiyot hamjamiyati va yaqinlari uchun og‘ir yo‘qotish hisoblanadi.
