O‘zbekiston snayperlari Xitoyda ikki yo‘nalishda g‘olib bo‘ldi

O‘zbekiston snayperlari Xitoyning Urumchi shahrida o‘tkazilgan “O‘tkir qilich-2025” xalqaro turnirida ikki yo‘nalishda g‘olib bo‘ldi, deb xabar beradi Respublika Milliy gvardiyasi matbuot xizmati. Bu haqida Zamin.uz xabar berdi.

Mazkur musobaqada jami 25 davlatdan 45 jamoa ishtirok etdi. O‘zbekiston vakillari 1,2 kilometr masofadagi 24 ta nishonni tezlik bilan yo‘q qilish va 100 dan 650 metrgacha bo‘lgan masofadagi shahar sharoitidagi 6 ta ob’ektni aniq urish bo‘yicha birinchi o‘rinni egalladi.

Bundan tashqari, boshqa yo‘nalishlarda ham o‘zbekistonlik harbiylar 8 ta medal, 10 ta diplom hamda bir nechta esdalik sovrinlarga sazovor bo‘ldi. Musobaqada Janubiy Koreya, Vengriya, Ispaniya, Indoneziya, Kuba va Rossiya kabi mamlakatlar vakillari ham faol ishtirok etdi.

Ushbu natijalar O‘zbekiston snayperlarining yuqori malakasi va jangovar tayyorgarligining yorqin ifodasidir. Turnirda erishilgan muvaffaqiyatlar milliy gvardiyaning professional darajasini yanada oshirishga xizmat qiladi.