Xorazmda keng ko‘lamda Qovun sayli boshlanadi
Avgust oyining boshlaridan Xorazm viloyati yana sayyohlar va mahalliy aholi e’tiborida bo‘ladi. Bu haqida Zamin.uz xabar berdi.
O‘zbekiston Turizm qo‘mitasi hamda Xorazm viloyati hokimligi hamkorligida o‘tkaziladigan an’anaviy “Qovun sayli” festivali bu yil yanada keng ko‘lamda tashkil etilishi kutilmoqda. Festival doirasida viloyatning barcha shahar va tumanlarida yetishtirilgan turli hil qovunlar ko‘rgazmasi va savdosi tashkil etiladi.
Har bir pavilon milliy an’ana, hududiy uslub va rang-baranglik asosida bezatiladi, bu esa mehmonlarga bayramona muhit yaratadi. Saylda faqat shirin qovunlar emas, balki milliy madaniyatning turli jihatlari ham namoyon bo‘ladi.
Teatrlashtirilgan sahna ko‘rinishlari, qo‘g‘irchoq teatri, milliy liboslar defilesi, Xorazm nonlari hamda o‘ziga xos taomlar savdosi va hunarmandchilik ko‘rgazmalari festival dasturini boyitadi. Folklor guruhlari va badiiy jamoalar jonli ijroda kuy-qo‘shiqlarni taqdim etadi.
San’atga qiziqqanlar uchun tasviriy va amaliy san’at ko‘rgazmalari tashkil etiladi. Bolalar uchun esa maxsus o‘yin maydonchalari va mahorat darslari tayyorlanadi.
Festivalda faol ishtirok etganlar Xorazm viloyati hokimligi va homiylar tomonidan turli nominatsiyalar bo‘yicha qimmatbaho sovg‘alar bilan taqdirlanadi. Bu qatnashchilarga rag‘bat bo‘lib, festivalga bo‘lgan qiziqishni oshiradi.
Eng shiddatli va kutilgan tadbirlar 8-9 avgust kunlari Xivaning tarixiy “Ichan qal’a” majmuasida, 10 avgustda esa “Arda Xiva” turizm majmuasida bo‘lib o‘tadigan gala konsertlardir. Ushbu konsertlarda mahalliy va xorijiy san’atkorlar jonli ijroda chiqish qiladi, bu festival kayfiyatini yanada oshiradi.
“Qovun sayli” nafaqat qovunlarni taqdim etish, balki xalq hayoti, madaniyati va mehmondo‘stligini namoyish etuvchi yirik madaniy tadbirdir. Saylda ishtirok etish orqali mehmonlar nafaqat mazali mevalardan bahramand bo‘ladi, balki o‘zbek xalqining boy madaniy merosi bilan yaqindan tanishish imkoniga ega bo‘ladi.
