Bog‘dorchilik instituti GIZ bilan iqlim loyihasini boshladi

O‘zbekistonning Bog‘dorchilik va uzumchilik ilmiy-tadqiqot instituti Germaniyaning Xalqaro hamkorlik jamiyati (GIZ) bilan "Markaziy Osiyoda iqlim xavfini boshqarish" loyihasi doirasida anglashuv memorandumini imzoladi. Bu haqida Zamin.uz xabar berdi.

Ushbu loyiha Germaniya Iqtisodiy hamkorlik va taraqqiyot federal vazirligi (BMZ) tomonidan moliyalashtiriladi va 2028 yilgacha davom etishi rejalashtirilgan. Hamkorlikning asosiy maqsadi iqlim o‘zgarishlari va tabiiy ofatlar xavfini kamaytirish, shuningdek, transchegaraviy suv resurslarini samarali boshqarish bo‘yicha ilmiy va amaliy salohiyatni oshirishdir.

Zarafshon daryosi havzasida zamonaviy, aqlli tomchilatib sug‘orish tizimlari joriy qilinib, qishloq xo‘jaligi sohasida modernizatsiya ishlari olib boriladi. 2025 yilgacha Navoiy viloyatida 10 gektar maydonda intensiv bog‘ barpo etilishi va sug‘orish tizimi yo‘lga qo‘yilishi ko‘zda tutilgan.

Loyiha suv resurslaridan oqilona foydalanish, qurg‘oqchil yillarda hosildorlikni saqlab qolish, ekologik muvozanatni ta’minlash hamda agrosanoat samaradorligini oshirish kabi muhim vazifalarni o‘z ichiga oladi. Mutaxassislarning ta’kidlashicha, ushbu tajriba uzoq muddatda boshqa hududlarga namunaviy tarzda tatbiq etilishi rejalashtirilgan.

Bu ishlar qishloq xo‘jaligi sohasida barqaror rivojlanishga xizmat qiladi va iqlim o‘zgarishlariga moslashishda muhim ahamiyat kasb etadi.