Toshkent va Farg‘onada jinoyatga qarshi yangi tizim
Toshkent va Farg‘ona viloyatlaridagi jinoyatchilik darajasi yuqori bo‘lgan mahallalarda huquqbuzarliklarning oldini olishga yangi tizim joriy etildi. Bu haqida Zamin.uz xabar berdi.
Ichki ishlar vazirining yangi buyrug‘iga muvofiq, profilaktika sohasida ko‘p yillik amaliy tajribaga ega bo‘lgan sobiq ichki ishlar xodimlari, ya’ni pensionerlar shartnoma asosida ushbu yo‘nalishda faoliyat yuritadi. Ushbu tashabbus «Ichki ishlar organlari to‘g‘risida»gi qonun va davlat rahbarining xodimlar bilan ishlash hamda xizmat sifatini oshirishga doir qarori asosida ishlab chiqilgan.
Maqsad – jinoyatchilik ko‘p uchraydigan hududlarda jinoyatlarning oldini olish, tajribali kadrlarning salohiyatidan samarali foydalanish orqali huquqbuzarliklarga qarshi kurashni kuchaytirishdir. Pensionerlar faqat ixtiyoriy ravishda va ochiq tanlov orqali ishga qabul qilinadi.
Tanlovda jins, yosh, ijtimoiy maqom yoki millatga qarab hech qanday cheklov yoki kamsitish yo‘q. Asosiy talablar ichki ishlar organlarida kamida besh yil ishlaganlik, ish faoliyati bo‘yicha ijobiy tavsiyalar, sog‘lik holatining mosligi va sudlanganlikning yo‘qligidir.
Ichki ishlar organlari har yili jinoyatchilik holatini tahlil qilib, muammoli hududlar ro‘yxatini yangilaydi. Tanlov jarayonida nomzodlar suhbat asosida besh ballik tizimda baholanadi.
Agar baholar teng kelsa, yakuniy qarorni komissiya raisi qabul qiladi. Tanlov g‘oliblari bilan shartnoma imzolanadi va ular har oy pensiyalariga teng miqdorda oylik maosh oladi.
Bu mablag‘lar huquqbuzarliklarning oldini olish tizimini rivojlantirish jamg‘armasi tomonidan moliyalashtiriladi. Yangi tizim joriy etilgach, ichki ishlar vazirligida tajribali pensionerlarning bilim va ko‘nikmalari muammoli hududlarda samarali qo‘llaniladi.
Bu esa jamoatchilik bilan huquqni muhofaza qiluvchi organlar o‘rtasidagi hamkorlikni mustahkamlashga va xavfsizlikni ta’minlashga xizmat qiladi. Shu bilan huquqbuzarliklarni oldini olishda yangi bosqich boshlanib, aholi uchun ijtimoiy himoya va xavfsizlik bo‘yicha qo‘shimcha imkoniyatlar yaratiladi (manba: norma.uz).
