Toshkentdan Chorvoqgacha yangi yo‘l quriladi
Toshkent shahri bilan Chorvoq hududi o‘rtasida yangi avtomobil yo‘lini qurish loyihasi amalga oshiriladi. Bu haqida Zamin.uz xabar berdi.
O‘zbekiston Respublikasi transport vaziri Ilhom Mahkamovning “O‘zbekiston 24” telekanaliga bergan intervyusiga ko‘ra, bu loyiha Toshkent viloyati, Toshkent shahri va Sirdaryo viloyati hududlarini qamrab oladi. Loyihaning maqsadi “Chorvoq-Chimyon” dam olish va rekreatsion zonasiga olib boruvchi transport infratuzilmasini yaxshilashdir.
Hozirda loyihaning konsepsiyasi tayyorlangan bo‘lib, u tanlov asosida amalga oshiriladi. Ishlar xalqaro miqyosdagi yetakchi kompaniyalar bilan hamkorlikda, davlat va xususiy sektorning sheriklik mexanizmi asosida bajariladi.
Transport vaziri Ilhom Mahkamovning ta’kidlashicha, mavjud yo‘nalishlarga ta’sir qilmasdan, Toshkentdan Chorvoq yo‘nalishigacha yangi avtomobil yo‘li qurish ishlari boshlanadi. Ushbu yo‘l fuqarolarga tez va qulay harakatlanish imkonini beradi, shuningdek, sayyohlar uchun katta qulaylik yaratadi.
Bundan tashqari, yangi infratuzilma investitsion va turistik jozibadorlikni oshirishga xizmat qiladi. Loyihaning amalga oshirilishi hududlararo transport aloqalarini rivojlantirish va mintaqaviy iqtisodiyotni qo‘llab-quvvatlashda muhim ahamiyatga ega bo‘ladi (manba: O‘zbekiston 24).
