Mirziyoyev Turkmanistonga amaliy tashrif bilan bordi
O‘zbekiston Respublikasi Prezidenti Shavkat Mirziyoyev 4 avgust kuni Turkmaniston Prezidenti Serdar Berdimuhamedovning taklifiga binoan ushbu mamlakatga amaliy tashrif bilan yo‘l oldi. Bu haqida Zamin.uz xabar berdi.
Bu haqda Prezident matbuot xizmati ma’lumot berdi. Prezident Mirziyoyev Avzada shahrida bo‘lib o‘tadigan BMTning dengizga chiqish imkoni bo‘lmagan rivojlanayotgan davlatlar bo‘yicha uchinchi konferensiyasida ishtirok etadi.
Ushbu tadbir transport sohasidagi hamkorlikni mustahkamlash, savdo jarayonlarini soddalashtirish, iqtisodiy islohotlar, iqlim o‘zgarishi va ekologik xavflarga tayyorgarlik ko‘rish, shuningdek, barqaror rivojlanish maqsadlarini amalga oshirish masalalariga bag‘ishlangan. Konferensiya yakunida Avzada siyosiy deklaratsiyasi va harakatlar dasturi qabul qilinishi rejalashtirilgan.
Shuningdek, Shavkat Mirziyoyev Markaziy Osiyo davlatlari rahbarlarining yettinchi Maslahat uchrashuviga tayyorgarlik ko‘rishga bag‘ishlangan tadbirda ham ishtirok etadi. Tashrif davomida Prezident ikki tomonlama uchrashuvlar va muzokaralar o‘tkazishi kutilmoqda.
Manba: Prezident matbuot xizmati.
