2025 yil 6 avgustdan boshlab O‘zbekistonda hayvonlarni hisobga olish, identifikatsiya qilish va kuzatish bo‘yicha yangi tartib joriy etildi. Bu haqida Zamin.uz xabar berdi.
Ushbu qonunga muvofiq, xususiy shaxslar va tashkilotlarda boqilayotgan barcha hayvonlar majburiy ravishda ro‘yxatdan o‘tkazilishi va belgilanishi lozim. Bu haqda Adliya vazirligi rasmiy sayti adliya.uz xabar berdi.
Yangi tartibni nazorat qilish vazifasi Veterinariya tibbiyoti va chorvachilikni rivojlantirish qo‘mitasiga yuklatilgan. Qonunda hayvonlarni ro‘yxatga olish uchun aniq muddatlar belgilangan.
Masalan, qoramol, qo‘y, echki va tuyalar tug‘ilgandan so‘ng 14 kun ichida ro‘yxatga olinishi shart. Otlar uchun bu muddat 4 oy, cho‘chqalar uchun 1 oy, it va mushuklar uchun esa 3 oy etib belgilangan.
Agar egasi ko‘rsatilgan muddatda ro‘yxatdan o‘tkazishni amalga oshira olmasa, unga yana 1 oy qo‘shimcha vaqt beriladi. Shuningdek, O‘zbekistonga import qilinayotgan hayvonlar ham 21 kun ichida identifikatsiya qilinishi lozim.
Qonunning asosiy maqsadi hayvonlarning sonini aniq hisobga olish, ularning holatini monitoring qilish, yuqumli kasalliklarning oldini olish va veterinariya nazoratini kuchaytirishdir. Identifikatsiya jarayonida hayvonga maxsus raqam beriladi va unga veterinariya pasporti rasmiylashtiriladi.
Belgilash uchun marka, tatuirovka yoki teg qo‘yish bilan birga mikrochip o‘rnatish amaliyoti ham joriy etiladi. Mikrochip orqali hayvonning sog‘lig‘i, egasi, emlashlari va boshqa ma’lumotlar yagona ma’lumotlar bazasiga kiritiladi.
Mutaxassislarning ta’kidlashicha, ushbu tartibni joriy etish natijasida ko‘plab muammolar hal etiladi. Chunki nazoratsiz hayvonlar orqali yuqumli kasalliklar tarqalishi va ekotizimga salbiy ta’sir ko‘rsatishi xavfi mavjud edi.
Shu tariqa qonun nafaqat hayvonlar, balki insonlarning xavfsizligini ham ta’minlashga xizmat qiladi. Manba: adliya.uz
