O‘zbekistonda hayvonlarni majburiy ro‘yxatga olish joriy etildi
O‘zbekistonda hayvonlarni identifikatsiya qilish, ro‘yxatga olish va kuzatish tartibi yangi qonun bilan mustahkamlandi. Bu haqida Zamin.uz xabar berdi.
Yaqinda qabul qilingan “Hayvonlarni identifikatsiya qilish, ro‘yxatga olish va kuzatish to‘g‘risida”gi qonun ushbu sohada faoliyat yuritishni tartibga solish uchun huquqiy asos yaratdi. Unga ko‘ra, O‘zbekiston hududida jismoniy yoki yuridik shaxslar tomonidan saqlanadigan yoki ko‘paytiriladigan barcha hayvonlar maxsus tartibda identifikatsiya qilinishi va ro‘yxatga olinishi majburiy hisoblanadi.
Bu jarayonni Veterinariya va chorvachilikni rivojlantirish qo‘mitasi nazorat qiladi hamda vakolatli davlat organi sifatida belgilangan. Qonunda hayvonlarni ro‘yxatga olish muddatlari aniq ko‘rsatilgan.
Masalan, qoramol, qo‘y, echki va tuyalar tug‘ilganidan keyin 14 kun ichida, otlar 4 oydan so‘ng, cho‘chqalar 1 oy o‘tgach, it va mushuklar esa 3 oy o‘tgach ro‘yxatga olinishi lozim. Belgilangan muddatlardan so‘ng esa yana 1 oy ichida hayvonlar identifikatsiyadan o‘tishi shart.
Bundan tashqari, chetdan olib kirilayotgan hayvonlar mamlakatga kirganidan keyin 21 kun ichida hisobga olinishi talab etiladi. Ushbu qonun hayvonlarning sog‘lig‘i va nazoratini yaxshilashga, shuningdek, ularning holatini aniq kuzatishga xizmat qiladi.
Manba: zamin.uz
