Bo‘stonliqda suv omboriga kanalizatsiya oqizildi, jarima qo‘yildi
Toshkent viloyatining Bo‘stonliq tumanida sodir bo‘lgan voqea ijtimoiy tarmoqlarda keng muhokamalarga sabab bo‘ldi. Bu haqida Zamin.uz xabar berdi.
Chorvoq suv omboridan chiqayotgan iflos va yomon hidli suv tasvirlari ko‘plab internet foydalanuvchilarini xavotirga soldi. Videoyozuvlarda kanalizatsiya quvurlarining to‘g‘ridan to‘g‘ri suv omboriga ulanganligi aniq ko‘rindi.
Bu holat nafaqat hayrat, balki jiddiy xavotir uyg‘otdi. O‘tkazilgan surishtiruvlar natijasida Burchmulla mahallasiga yaqin hududda ayrim fuqarolar kanalizatsiya, yomg‘ir va sug‘orish suvlarini to‘g‘ridan to‘g‘ri Chorvoq suv omboriga oqizish uchun maxsus ariqlar qazib, plastik quvurlar o‘rnatgani ma’lum bo‘ldi.
Bu esa ekologik muvozanatga va ommaviy salomatlikka katta zarar yetkazadi. Ekologik nazorat organlari, ichki ishlar va jinoyat-profilaktika xizmatlari hamkorligida olib borilgan tekshiruvlar natijasida suv omboriga javobgar bo‘lgan xodimga nisbatan qonuniy chora ko‘rildi.
Unga O‘zbekiston Respublikasi Jinoyat kodeksining 82-moddasi 2-qismi asosida ma’muriy bayonnoma rasmiylashtirilib, 4 million 120 ming so‘m jarima solindi. Shuningdek, mutaxassislar tomonidan noqonuniy qazilgan ariqlar va o‘rnatilgan kanalizatsiya quvurlari butunlay olib tashlandi.
Ushbu voqea ekologik qoidalarga rioya qilmaslik jamiyat xavfsizligiga jiddiy tahdid solishini yana bir bor ko‘rsatdi. Davlat organlari bunday holatlarga nisbatan qat’iy choralar ko‘rishda davom etadi (manba: zamin.uz).
