Abituriyentlar 8 avgustga qadar OTM tanlashi kerak

Abituriyentlar 8 avgustga qadar oliy ta’lim muassasalari va ta’lim yo‘nalishlarini tanlashi zarur. Bu haqida Zamin.uz xabar berdi.

Buning uchun my.uzbmb.uz saytidagi «Oliy va professional ta’lim muassasalariga qabul» bo‘limiga kirib, «Xizmatdan foydalanish» tugmasini bosish lozim. Keyin «OTM tanlash» bo‘limiga o‘tiladi.

Dastlab abituriyent «Tanlov ustuvorligi» hamda «Maqsadli qabul» parametrlarini belgilaydi. Shundan so‘ng, test topshirgan fanlar majmuasi va ta’lim tiliga mos ravishda, beshtagacha oliy ta’lim muassasasi va ta’lim yo‘nalishini ta’lim shakli bilan birga tanlash mumkin.

Tanlovdan so‘ng «Saqlash» tugmasi bosiladi va ma’lumotlarni tasdiqlash uchun abituriyentning telefon raqamiga SMS xabar yuboriladi. SMSdagi kod dasturga kiritilgach, ma’lumotlar rasmiy ravishda tasdiqlanadi.

Ma’lumotlar tasdiqlangach, «Abituriyent qayd varaqasi» hosil bo‘ladi. Unda tanlov ustuvorligi, ta’lim shakllari, oliy ta’lim muassasalari va tanlangan yo‘nalishlar aks etadi.

Qayd varaqani yuklab olish tugmasi orqali abituriyent o‘ziga kerakli hujjatni olishi mumkin. Ta’lim yo‘nalishlarini tanlash muddati tugaguncha abituriyent o‘z ma’lumotlarini o‘zgartirishi va qayd varaqasini qayta yuklab olishi mumkin.

Talabalikka tavsiya etilgan yoki tavsiya etilmaganlik haqidagi yakuniy natijalar ta’lim yo‘nalishlari tanlovi to‘liq yakunlangach, bir hafta ichida e’lon qilinadi. O‘tgan yilgi o‘tish ballari asosida qaysi OTMga kirish mumkinligini aniqlash uchun quyidagi botlardan foydalanish mumkin: @mandat_javobbot, @e_uzbmb_mandatbot va @bmb_natijabot.

Manba: my.uzbmb.uz.