Oliy ta’limda yangi baholash tizimi joriy etiladi

Endilikda oliy ta’lim muassasalarida “Yangi O‘zbekiston” universitetida qo‘llanilayotgan baholash tizimi joriy etiladi. Bu haqida Zamin.uz xabar berdi.

Ushbu tizim mas’ul idoralar tomonidan tasdiqlangan va amaliyotga kiritilishi rejalashtirilgan. Yangi baholash tizimida bitiruvchilarning ishga joylashish ko‘rsatkichi 40 ball bilan baholanadi.

Shuningdek, ilmiy tadqiqotlar uchun tarmoq buyurtmalari va mahsulot sotilishiga qarab 30 ball beriladi. Ilmiy salohiyat va xalqaro jurnallardagi maqolalar esa 20 ball bilan baholanadi.

Bundan tashqari, mahalliy va xorijiy grantlar asosida olib borilgan tadqiqotlar uchun 10 ballgacha ballar ajratiladi. Masalan, Qarshi texnika universiteti umumiy ballning 85 foizini to‘plagan taqdirda, unga 78 milliard so‘mlik budjet mablag‘iga qo‘shimcha 20 foiz bonus beriladi.

Agar umumiy ball 56 foizdan kam bo‘lsa, keyingi o‘quv yilida moliyalashtirish miqdori kamaytiriladi. Shuningdek, ilmiy yo‘nalishdagi oliy ta’lim muassasalari bilan ijtimoiy sohadagi universitetlarni bir xil mezonlarda baholash mumkin emasligi ta’kidlandi.

Ushbu baholash tizimi oliy ta’lim sifatini oshirish va universitetlarning samaradorligini yaxshilashga qaratilgan. Manba: zamin.uz