Abituriyentlar beshta oliygohni tanlash huquqiga ega
Prezident Shavkat Mirziyoyev ta’lim sohasida adolat va teng imkoniyatlarni ta’minlash maqsadida yangi tashabbusni e’lon qildi. Bu haqida Zamin.uz xabar berdi.
Endilikda abituriyentlar oliy ta’lim muassasalariga kirishda beshta oliygohni tanlash huquqiga ega bo‘ladi. Agar ular tanlagan beshta oliygohdan birortasiga kira olmasa, uning ballari boshqa oliygohdagi bo‘sh o‘ringa mos kelsa, o‘sha muassasa rektori uni shartnoma asosida qabul qilishi mumkin.
Bu yangi tizim davlat va xususiy ta’lim muassasalari o‘rtasida sog‘lom raqobatni shakllantirishga xizmat qiladi. Shuningdek, rektorlarning vakolatlari kengaytiriladi va ularning mas’uliyati oshiriladi.
Rektorlar o‘zlari tayinlaydigan o‘rinbosarlarning yillik ish rejalarini oliygoh kengashida himoya qilishi majburiy bo‘ladi. Yangi O‘zbekiston universitetida qo‘llanayotgan baholash tizimi endi barcha oliygohlarga joriy etiladi.
Universitetlarning moliyalashtirilishi ularning to‘plagan ballariga qarab amalga oshiriladi. Ballar ishga joylashish darajasi, ilmiy tadqiqotlar, maqolalar va grantlar asosida beriladi.
Masalan, Qarshi texnika universiteti 85 foiz ball to‘plasa, davlatdan ajratilgan mablag‘ga qo‘shimcha 20 foiz bonus oladi, 56 foizdan kam bo‘lsa, mablag‘ kamaytiriladi. Ijtimoiy va ilmiy yo‘nalishdagi oliygohlar maxsus mezonlar bo‘yicha baholanadi.
Prezident mutaxassislarga reyting mezonlarini qayta ishlab chiqishni topshirdi. Yangi tartibda o‘zini o‘zi band qilgan bitiruvchilar ishga joylashtirishda hisobga olinmaydi.
Shuningdek, rektorlar va prorektorlar maxsus tayyorlov kurslaridan o‘tadi, eng yaxshi nomzodlar malaka oshirish uchun Garvard universitetiga yuboriladi. Rektorlarga superkontrakt miqdorini mustaqil belgilash, professor-o‘qituvchilarni shtat bo‘yicha erkin taqsimlash va o‘z budjetini boshqarish imkoniyatlari beriladi.
Shu bilan Yangi O‘zbekiston ta’lim tizimida muhim islohotlar boshlangan bo‘lib, bu nafaqat yoshlar, balki ta’lim muassasalari rahbarlari uchun yangi imkoniyatlar yaratadi (manba: zamin.uz).
