Soliq bazasidagi nosozlikda 399 milliard so‘m yechildi

Soliq qo‘mitasining ma’lumotlariga ko‘ra, ma’lumotlar bazasida yuzaga kelgan texnik nosozlik sababli 30,1 ming soliq to‘lovchining hisobidan asossiz ravishda jami 399,3 milliard so‘m mablag‘ yechib olingan. Bu haqida Zamin.uz xabar berdi.

Ushbu holatda turli miqdordagi pullar turli sonlarda soliq to‘lovchilardan yechilgan. Jumladan, 7 203 nafar soliq to‘lovchidan 100 ming so‘mgacha, 10 165 nafaridan 100 mingdan 1 million so‘mgacha, 8 270 nafaridan 1 milliondan 10 million so‘mgacha, 3 780 nafaridan 10 milliondan 100 million so‘mgacha, 672 nafaridan 100 milliondan 1 milliard so‘mgacha va 10 nafaridan 1 milliard so‘mdan ortiq mablag‘lar noto‘g‘ri yechib olinganligi aniqlangan.

Soliq organlari ushbu mablag‘larni soliq to‘lovchilarning hisob raqamlariga qaytarish uchun zarur choralarni ko‘rmoqda. Barcha tegishli xulosalar G‘aznachilikka taqdim etilgan va qaytarish jarayoni avtomatik tarzda amalga oshirilmoqda.

Fuqarolardan yozma ariza talab qilinmaydi. Bugungi soat 18:00 holatiga ko‘ra, 20 608 ta subyektga jami 274,7 milliard so‘m mablag‘ qaytarilgan.

Ma’lumotlar Soliq qo‘mitasidan olingan.