Falastinliklarga O‘zbekistonda keng ko‘lamli yordam beriladi
O‘zbekistonga keltirilgan falastinlik fuqarolarga davlat tomonidan keng ko‘lamli g‘amxo‘rlik va yordam ko‘rsatish tizimi yo‘lga qo‘yilmoqda. Bu haqida Zamin.uz xabar berdi.
Bu boradagi chora-tadbirlar Prezident Shavkat Mirziyoyevning 14 avgust kuni imzolagan “O‘zbekistondagi bir guruh falastinlik fuqarolarga davlat g‘amxo‘rligi, mehr-shafqat tamoyillari asosida ko‘mak berish tizimini yo‘lga qo‘yish chora-tadbirlari to‘g‘risida”gi farmonida belgilangan. Farmonga muvofiq, Maktabgacha va maktab ta’limi vazirligi falastinlik bolalarni yashash joylari bo‘yicha davlat maktabgacha ta’lim muassasalari hamda maktablarga joylashtiradi.
Ularning ta’lim jarayoniga tezroq moslashishi uchun muassasa rahbarlari o‘rinbosarlari biriktiriladi. Shuningdek, Oliy ta’lim, fan va innovatsiyalar vazirligi bilan hamkorlikda bolalarning moslashuvi va rivojlanishini ta’minlash maqsadida doimiy monitoring tashkil etiladi.
Falastinlik bolalar 2028 yil 1 yanvariga qadar davlat maktabgacha ta’lim muassasalarida ota-ona to‘lovidan to‘liq ozod qilinadi. Ular navbatga turmasdan, “Inson” ijtimoiy xizmatlar markazlari talabnomasi asosida qabul qilinadi.
Bundan tashqari, Prezidentning 2025 yil 17 yanvardagi qarori doirasida falastinlik o‘quvchilar davlat umumiy o‘rta ta’lim muassasalarida qo‘shimcha ta’lim olish imkoniyatiga ega bo‘ladi. Bu ta’lim kasb-hunar, axborot texnologiyalari hamda oliy ta’limga tayyorgarlik yo‘nalishlarini o‘z ichiga oladi va barcha xarajatlar Davlat budjeti hisobidan qoplanadi.
Oliy ta’lim, fan va innovatsiyalar vazirligi xorijda olingan umumiy o‘rta maxsus, kasb-hunar, oliy ta’lim, qayta tayyorlash va malaka oshirish hujjatlarini ikki oy ichida test sinovlarisiz va yig‘imsiz tan oladi. Bu falastinliklarning O‘zbekistonda kasbiy va ilmiy faoliyatini tez va to‘siqsiz davom ettirishiga imkon beradi.
Sog‘liqni saqlash vazirligi esa falastinlik fuqarolarni yashash joylari bo‘yicha oilaviy shifokor punktlari, poliklinikalar hamda ko‘p tarmoqli markaziy poliklinikalarda ro‘yxatga oladi. Ular kambag‘al oilalar toifasida bepul tibbiy yordam olish huquqiga ega bo‘lib, zarur yo‘llanmalar Davlat budjeti hisobidan beriladi.
Mazkur farmon O‘zbekistonning insonparvarlik siyosati va mehr-shafqat an’analarini yana bir bor tasdiqlab, falastinliklar uchun yangi imkoniyatlar eshigini ochdi (manba: zamin.uz).
