Toshkentda maktab avtobuslari yo‘l tirbandligini kamaytiradi
Tez orada Toshkent shahrida yo‘l tirbandligini kamaytirish maqsadida bolalarni maktabga olib borish va olib kelish uchun maxsus maktab avtobuslari tizimi yo‘lga qo‘yilishi rejalashtirilmoqda. Bu haqida Zamin.uz xabar berdi.
Mutasaddilar bu tashabbus shahar transport tizimida sezilarli darajada yengillik yaratishini ta’kidlamoqda. Hozirgi kuzatuvlarga ko‘ra, o‘quv yili tugagach, poytaxtdagi transport harakati ancha kamayadi.
Buning asosiy sababi ota-onalarning bolalarni maktabga shaxsiy avtomashinalarda olib bormasligi va yo‘llardagi transport oqimining kamayishidir. Shu bois, maktab avtobuslarini joriy etish yil davomida ham yo‘l tirbandligini kamaytirishga yordam beradi.
Har bir avtobus bir vaqtning o‘zida 20 dan 30 nafargacha o‘quvchini tashishi mumkin. Bu esa yo‘llardan shuncha miqdorda shaxsiy avtomashinani olib tashlash, tirbandlikni kamaytirish va chiqindilar miqdorini kamaytirishga xizmat qiladi.
Maxsus avtobuslar harakat xavfsizligi talablariga to‘liq javob beradigan jihozlar bilan ta’minlanadi. Hozirda ushbu loyiha Maktabgacha va maktab ta’limi vazirligi bilan muhokama qilinmoqda.
Agar loyiha amalga oshirilsa, poytaxtdagi jamoat transporti tizimida muhim o‘zgarishlar yuz beradi. Manba: zamin.uz.
