Ka’baning kisvasi O‘zbekistonga olib kelingan
O‘zbekiston tarixida unutilmas voqea yuz berdi. Bu haqida Zamin.uz xabar berdi.
Saudiya Arabistonidan muqaddas Ka’baning eshigiga tegishli bo‘lgan yopinchiq, ya’ni kisvaning to‘liq qismi yurtimizga olib kelindi. Ushbu noyob artefakt Islom sivilizatsiyasi markazi muzeyida alohida ekspozitsiya sifatida namoyish etilishi rejalashtirilmoqda.
Ma’lumki, Ka’ba har yili yangi kisva bilan qoplanadi va u musulmonlar uchun muqaddas hamda ruhiy qadriyat sifatida qabul qilinadi. Shuning uchun uning kichik bir parchasi ham butun musulmon olamida katta ahamiyatga ega.
Joriy yilning fevral oyida O‘zbekiston prezidenti Shavkat Mirziyoyev Saudiya Arabistoni haj va umra ishlari vaziri Tavfiq bin Favzon ar-Rabia boshchiligidagi delegatsiyani qabul qilgan edi. Ushbu uchrashuvda davlat rahbariga Saudiya podshohi Salmon Ol Saud tomonidan yurtimiz xalqiga bag‘ishlangan muqaddas Ka’baning kisvasining bir parchasi topshirilgan edi.
Vaqt o‘tishi bilan butun eshik qismi, ya’ni Ka’baning eng qadrli qoplamasi O‘zbekistonga yetkazildi. Mutaxassislar bu voqeani mamlakatimiz tarixidagi muhim diniy va madaniy hodisa sifatida baholamoqda.
Chunki mazkur artefakt nafaqat musulmonlar uchun muqaddaslik ramzi, balki O‘zbekistonning islom sivilizatsiyasidagi o‘rni va ahamiyatining yana bir tasdig‘idir. Islom sivilizatsiyasi markazi ma’lumotlariga ko‘ra, ushbu yopinchiq muzeyda keng ko‘lamda namoyish etilib, minglab ziyoratchi va tadqiqotchilar uchun ochiq bo‘ladi.
Bu orqali musulmon dunyosi tarixi, muqaddas Ka’baning ahamiyati hamda Saudiya bilan hamkorlikning ramziy qimmati yanada keng yoritiladi. Ta’kidlash lozimki, bu hadya ikki davlat o‘rtasidagi diniy va madaniy aloqalarning mustahkamlanishidan darak beradi.
Saudiya podshohligi va O‘zbekiston o‘rtasidagi hamkorlik natijasida yurtimiz tarixiy merosi va musulmon sivilizatsiyasi bilan bog‘liq eksponatlar yanada boyib bormoqda. (Manba: zamin.uz)
