Qarshida samolyot qidiruv-o‘quvi muvaffaqiyatli o‘tdi
Qarshi shahrida parvozlarni qidiruv va qutqaruv ishlarini ta’minlashga qaratilgan amaliy o‘quv mashg‘uloti bo‘lib o‘tdi. Bu haqida Zamin.uz xabar berdi.
Ushbu mashg‘ulotlar favqulodda vaziyatlarga tayyorgarlik darajasini oshirish, xodimlar va texnik vositalarning muvofiqlashtirilishini sinash maqsadida tashkil etildi. Mashg‘ulot ssenariysiga ko‘ra, bortida 150 nafar yo‘lovchi va 5 nafar ekipaj a’zosi bo‘lgan yirik samolyot qo‘nishdan oldin signal uzatishni to‘xtatadi va aerodromdan 12 kilometr masofada radar ekranlaridan yo‘qoladi.
Bu holat katta halokat yuz berishi mumkinligini ko‘rsatadi. Shundan kelib chiqib, oldindan ishlab chiqilgan reja asosida belgilangan kuch va vositalar favqulodda vaziyat joyini izlash, aniqlash va hal qilish uchun yo‘naltirildi.
Har bir xizmat o‘z vazifasini aniq va tizimli bajarishi talab etildi. O‘quv mashg‘ulotlarida jami 150 nafar xodim ishtirok etdi.
Turli idora va xizmatlardan 22 ta maxsus texnika jalb qilindi. Qarshi aeroportining 80 nafar malakali xodimi va 7 ta maxsus texnikasi faol qatnashdi.
Mutaxassislarning ta’kidlashicha, bunday mashg‘ulotlar xavfsizlik tizimini mustahkamlashda, favqulodda vaziyatlarda tezkor va samarali harakat qilishda muhim ahamiyatga ega. Ayniqsa, yirik yo‘lovchi samolyotlar bilan bog‘liq favqulodda holatlarda jamoaviy va aniq harakatlar insonlarning hayotini saqlab qolishda asosiy omil hisoblanadi.
Manba: zamin.uz
