O‘rta Chirchiqda aviahalokatga tayyorgarlik mashg‘uloti o‘tkazildi
Toshkent viloyatining O‘rta Chirchiq tumanida favqulodda vaziyatlarga tayyorgarlikni oshirish maqsadida yirik o‘quv mashg‘uloti tashkil etildi. Bu haqida Zamin.uz xabar berdi.
Ushbu mashg‘ulot aviahalokat holatlarida qidiruv va qutqaruv ishlarini samarali tashkil etish hamda turli idoralar o‘rtasidagi hamkorlikni sinovdan o‘tkazishga qaratildi. Tadbir Mudofaa vazirligining desantchilarni tayyorlash markazida bo‘lib o‘tdi va shartli aviahalokat oqibatlarini bartaraf etish bo‘yicha amaliy ishlar amalga oshirildi.
Mashg‘ulotda yo‘lovchi samolyoti qo‘nish arafasida havo dispetcheri bilan aloqa uzilib, Toshkent shahriga yetmay halokatga uchrashi shartli vaziyat sifatida ko‘rsatildi. Natijada kuchli yong‘in yuzaga kelib, shartli ravishda qurbonlar va jarohatlanganlar paydo bo‘ldi.
Ushbu vaziyatni bartaraf etish uchun oldindan ishlab chiqilgan reja ishga tushirildi. Tadbirda 250 ga yaqin malakali mutaxassis va 20 dan ortiq maxsus texnika ishtirok etdi.
Ularning yordami bilan voqea joyini qidirish, yong‘inni o‘chirish va xavfsizlikni ta’minlash ishlari bajarildi. Qutqaruvchilar o‘z guruhlari tarkibida yong‘inni nazoratga olish, odamlarni xavfsiz hududga evakuatsiya qilish, jabrlanganlarga birinchi tibbiy yordam ko‘rsatish hamda ularni shifoxonalarga tezkor yetkazish vazifalarini bajarishdi.
Shuningdek, samolyot bortidagi xavfli yukni evakuatsiya qilish bo‘yicha ham amaliy mashg‘ulotlar o‘tkazildi. Mazkur tadbir favqulodda vaziyatlarga tayyorgarlik darajasini oshirish va qutqaruv ishlarini samarali tashkil etish bo‘yicha muhim tajriba bo‘ldi (manba: zamin.uz).
