Oliy ta’limda kontrakt narxi hozircha oshmaydi
2025/2026 o‘quv yilidan boshlab O‘zbekistondagi davlat oliy ta’lim muassasalarida kontrakt narxining oshirilishi mumkinligi haqida ijtimoiy tarmoqlarda turli xabarlar tarqalmoqda. Bu haqida Zamin.uz xabar berdi.
Biroq, Vazirlar Mahkamasi vakili Nazokat Abduqunduzova bu yil uchun kontrakt narxini oshirish bo‘yicha hech qanday rasmiy qaror qabul qilinmagani va hozircha narxlar o‘zgarishsiz qolishini ma’lum qildi. Shuningdek, Jahon iqtisodiyoti va diplomatiya universitetida (JIDU) 2025/2026 o‘quv yilidan boshlab kontrakt narxi 15 foizga oshirilgani haqida xabarlar tarqaldi.
Abduqunduzova ta’kidlaganidek, JIDU moliyaviy mustaqil oliy ta’lim muassasasi bo‘lgani sababli kontrakt narxini o‘z mustaqil qarori bilan belgilaydi. O‘zbekistonda shunday 40 dan ortiq moliyaviy mustaqil oliy ta’lim muassasalari mavjud.
Hozirgi vaqtda abituriyentlarga yaqin kunlarda yangi yo‘nalishlarni tanlash imkoniyati berilishi kutilmoqda. Bundan tashqari, “super-kontrakt” miqdorida ham o‘zgarishlar bo‘lishi mumkinligi aytilmoqda.
Bularning barchasi oliy ta’lim muassasalarining vakolatlari doirasida amalga oshiriladi. Shu sababli, abituriyentlar va ularning oilalari kontrakt narxi va moliyaviy sharoatlar bo‘yicha yangiliklarni diqqat bilan kuzatib borishlari zarur.
Manba: Zamin.uz
