Kembrij lug‘ati ingliz tilini o‘rganishda muhim manba hisoblanadi va muntazam ravishda yuzlab yangi so‘zlar bilan boyitilib kelmoqda. Bu haqida Zamin.uz xabar berdi.
Yaqinda lug‘atga 6000 ga yaqin yangi so‘z va iboralar qo‘shildi. Ushbu yangi so‘zlar orasida ijtimoiy tarmoqlarda, ommaviy axborot vositalarida va kundalik hayotda tez tarqalayotgan atamalar ham mavjud.
Masalan, «skibidi», «delulu» va «broligarchy» kabi so‘zlar keng tarqalgan. «Skibidi» so‘zi vaziyatga qarab turli ma’nolarga ega bo‘lib, u «zo‘r» yoki «yomon» ma’nolarida ishlatiladi.
Ushbu so‘z rus animator Aleksey Gerasimovning «Skibidi Toilet» nomli animatsion serialiga asoslanib mashhur bo‘lgan. Serialda harakatlanuvchi unitazlar va agentlar o‘rtasidagi kurash tasvirlanadi.
«Delulu» so‘zi esa ingliz tilidagi «delusional» so‘zining qisqartmasi bo‘lib, xayolparastlik yoki haqiqatga to‘g‘ri kelmaydigan tasavvurlarni anglatadi. «Tradwife» atamasi esa an’anaviy gender rollariga rioya qiluvchi va shu asosda yashovchi ayollarni ifodalaydi.
Bundan tashqari, «broligarchy» so‘zi texnologik biznesdagi boy va ta’sirchan kichik guruhlarni ta’riflaydi. Bu atama asosan amerikalik ishlab chiqaruvchilar va milliardlar egalariga nisbatan ishlatiladi.
Yana bir qiziqarli so‘z – «Mouse jiggler» bo‘lib, bu kompyuter dasturi hisoblanadi. U sichqoncha kursorini avtomatik tarzda harakatlantirib, kompyuterning bloklanishini oldini oladi.
Masofadan ishlovchilar orasida bu dastur juda mashhur, chunki u ish vaqtida «onlayn» holatini saqlashga yordam beradi. Kembrij lug‘ati rahbari Kolin Makintoshning ta’kidlashicha, lug‘at faqat dolzarb va keng qo‘llaniladigan so‘zlarni o‘z ichiga oladi.
Internet madaniyati ingliz tilini o‘zgartirmoqda va bu jarayonni kuzatish hamda lug‘atda qayd etish juda muhimdir. Shu sababli, yangi so‘zlar nafaqat internet va jargonlardan kelib chiqadi, balki ingliz tilining rivojlanishi va uning yangi bosqichlarini aks ettiradi.
2024 yilda Kembrij lug‘atiga 3200 dan ortiq yangi so‘zlar kiritilgan bo‘lsa, o‘tgan yil davomida yana 6000 dan ortiq yangi iboralar va jargonlar qo‘shilgan (manba: zamin.uz).
