Toshkent shahrida 2025 yil oxirigacha tungi avtobuslar qatnovi yo‘lga qo‘yiladi. Bu haqida Zamin.uz xabar berdi.
Bu haqda Toshkent shahar transport va yo‘l-transport infratuzilmasini rivojlantirish bosh boshqarmasi boshlig‘i vazifasini bajaruvchi Olloyor Norbo‘tayev ma’lum qildi (manba: Gazeta.uz). Yig‘ilishda poytaxtda tungi soat 22:00 dan ertalab 06:00 gacha harakatlanadigan qizil rangli avtobuslar yo‘lga qo‘yilishi rejalashtirilayotgani aytildi.
Ushbu avtobuslar aeroportlar, temiryo‘l vokzallari, metro bekatlari, turizm ko‘chalari, savdo va ko‘ngilochar markazlar, yirik dehqon bozorlari, talabalar yotoqxonasi hamda shifoxonalar orqali harakatlanadi. Tungi avtobus yo‘nalishlari ikki bosqichda tashkil etiladi.
Birinchi bosqichda 8 ta yo‘nalish bo‘lib, jami 136 kilometr yo‘l qamrab olinadi. Bu yo‘nalishlarda 31 ta avtobus qatnaydi.
Yo‘nalishlar quyidagicha: Qo‘yliq dehqon bozori — Husayn Boyqaro ko‘chasi, Qipchoq ko‘chasi — O‘zgarish metrosi, Chilonzor buyum bozori — Gulxaniy ko‘chasi, Mahalliy aeroport (Terminal 3) — Chorsu savdo markazi, Shifobaxsh suvlar ko‘chasi — Chorsu ASHB, Yunusobod mavzesi 6-daha — Yunusobod mavzesi 17-daha hamda Toshkent vokzali ASHB — Shofayz mahallasi. Avtobuslar T1, T2, T3 kabi raqamlanadi va yil oxirigacha T1 yo‘nalishi ishga tushirilishi rejalashtirilgan.
T1 yo‘nalishi Bektemir tumanining Husayn Boyqaro ko‘chasidan boshlab Qo‘yliq bozori tomon harakatlanadi. Ikkinchi bosqichda esa 7 ta yo‘nalish mavjud bo‘lib, umumiy uzunligi 98 kilometrni tashkil etadi.
Bu bosqichda 23 ta avtobus qatnaydi va unga 14,2 milliard so‘m mablag‘ ajratilishi ko‘zda tutilgan. Yo‘nalishlar orasida G‘ishtko‘prik chegara posti — Amir Temur xiyoboni, TTZ ASHB — Amir Temur xiyoboni, Food city majmuasi — Amir Temur xiyoboni va boshqa yo‘nalishlar bor.
Tungi avtobuslar orqali turizm yo‘nalishlarini tashkil etishning asosiy maqsadi harakatlanish zarur bo‘lgan shahar hududlarini aniqlash, yo‘lovchi oqimini rejalashtirish, xavfsizlikni ta’minlash, monitoring va raqamli to‘lov tizimlarini joriy etishdan iborat. Hozirda Toshkent shahrining bir qator ko‘chalarida turizm yo‘nalishlari tashkil qilinmoqda.
Chipta narxi kunduzgi qatnov bilan bir xil bo‘lib, bu yo‘nalishlarda jami 54 ta avtobus harakatlanadi. Norbo‘tayevning aytishicha, ushbu tizim mahalliy byudjetga o‘rtacha 33 milliard so‘m yuklama keltiradi.
Manba: Gazeta.uz
