Yuqori tezlikdagi Afrosiyob poyezdlarining barcha vagonlariga bepul wi-fi xizmatlari joriy etildi. Bu haqida Zamin.uz xabar berdi.
O‘zbekiston Transport vazirligi ma’lumotlariga ko‘ra, tarmoq butun poyezd parkida ishga tushirilgan bo‘lib, yo‘lovchilarga yanada qulay sharoitlar yaratildi. Endilikda yo‘lovchilar ichki mediaportalga cheklanmagan kirish imkoniyatiga ega bo‘ladilar.
Ushbu portalda filmlar, musiqa va O‘zbekistonning diqqatga sazovor joylari haqida ma’lumotlar jamlangan bo‘lib, safar davomida tez va oson foydalanish uchun moslashtirilgan. Har bir yo‘lovchiga 30 daqiqa davomida bepul internet-trafik taqdim etiladi.
Uzoqroq muddatli ulanish uchun alohida to‘lov belgilangan: 48 soatlik internet uchun 15 ming so‘m, oylik tarif esa 50 ming so‘mni tashkil etadi. Wi-fi tarmog‘iga ulanish uchun telefon raqamini kiritish va SMS orqali kelgan kodni tasdiqlash kifoya qiladi.
Faollashtirish jarayoni bir necha daqiqa ichida amalga oshiriladi. Ushbu yangilik yo‘lovchilarga safar vaqtida yanada qulay va samarali aloqa imkonini beradi (manba: kursiv.uz).
