Mahallalarda jinoyatlarni oldini olish tizimi kuchaytiriladi
O‘zbekiston Respublikasi Prezidentining qaroriga muvofiq, mahallalarda jinoyatchilikning barvaqt oldini olish tizimini yanada takomillashtirish maqsadida «Kriminogen vaziyati murakkab mahallalarda jinoyatlarning oldini olish bo‘yicha manzilli choralar» konsepsiyasi tasdiqlandi. Bu haqida Zamin.uz xabar berdi.
Ushbu konsepsiyaning asosiy vazifasi – mahallalarda kriminogen vaziyatni barqarorlashtirish va xavfsiz muhit yaratish uchun tashkiliy-profilaktik tadbirlar hamda ilmiy-amaliy yondashuvlarni uyg‘unlashtirishdan iboratdir. Konsepsiyaga ko‘ra, 2025 yil yakunigacha tuman yoki shahar ichki ishlar organi boshlig‘i hamda prokurorning xizmat xonasi bevosita mahallalarda tashkil etiladi.
Ular kundalik ish faoliyatini aynan shu joyda boshlaydi va yakunlaydi. Shuningdek, bosqichma-bosqich mahallalarda huquq-tartibot maskanlari faoliyati yo‘lga qo‘yiladi.
Ijtimoiy profilaktika obyektlarida, ayniqsa oilaviy nizolar va huquqbuzarliklar sodir etadigan shaxslar holidan kamida har uch kunda xabar olish tartibi joriy etiladi. Bundan tashqari, jinoyatchilikning oldini olish uchun «mahalla yettiligi» tomonidan fuqarolar o‘rtasida targ‘ibot-tashviqot ishlarini olib boruvchi «mahalla targ‘ibotchisi» jamoatchilik guruhlari tashkil qilinadi.
Mahallalardagi jamoat joylari, ko‘p qavatli uylar oldiga esa «Tashvish» tugmalari o‘rnatilishi rejalashtirilgan. Bu chora-tadbirlar mahalla xavfsizligini oshirishga qaratilgan.
Manba: zamin.uz
