Oilaviy nizolarni erta aniqlash tartibi joriy qilindi
O‘zbekiston Respublikasida oilaviy ziddiyatlarni erta aniqlash va huquqbuzarliklarning oldini olish maqsadida yangi tartib joriy etilmoqda. Bu haqida Zamin.uz xabar berdi.
Joriy yilning 18-avgust kuni Prezident qarori bilan jinoyatchilik xavfi yuqori bo‘lgan mahallalarda nizoli va janjalkash oilalar har uch kunda muntazam ravishda nazorat qilinishi belgilandi. Ushbu tartibga ko‘ra, ichki ishlar organlari xodimlari va “mahalla yettiligi” tarkibidagi fuqarolar oilaviy mojaro bo‘lishi mumkin bo‘lgan xonadonlarni doimiy nazorat ostida tutadi.
Shuningdek, mahallalarda “mahalla targ‘ibotchilari” nomli jamoatchilik guruhlari tashkil etiladi. Ular oilalarga yordam berish va nizolarni oldini olish uchun faoliyat yuritadi.
Qarorga muvofiq, jinoyatchilik xavfi yuqori bo‘lgan hududlar to‘liq video kuzatuv tizimi bilan jihozlanadi. Xavfsizlikni oshirish maqsadida “tashvish tugmalari” o‘rnatiladi.
Bundan tashqari, ilg‘or tajriba sifatida “namunali xavfsiz uy” hamda “namunali xavfsiz ko‘cha” loyihalari amalga oshiriladi. Ushbu chora-tadbirlar aholining xavfsizligini ta’minlash, oilaviy nizolarni kamaytirish va jamiyatda barqaror muhit yaratishga qaratilgan.
Manba: zamin.uz
