Qo‘shilgan qiymat solig‘i (QQS) tizimiga o‘tayotgan korxonalar bir yil davomida foyda solig‘idan ozod etiladi. Bu haqida Zamin.uz xabar berdi.
Bu haqda Prezident Shavkat Mirziyoyev tadbirkorlar bilan uchrashuvda ma’lum qildi. QQS stavkasi 12 foizga tushirilgani sababli, ushbu tizimga o‘tayotgan tadbirkorlar soni ortib bormoqda.
Yangi imtiyozlar doirasida QQSga o‘tgan korxonalarda hisob-kitobda xatolik yuzaga kelsa, jarima qo‘llanmaydi. Shuningdek, buxgalter maoshining 5 million so‘mgacha bo‘lgan qismi olti oy davomida soliqlardan ozod qilinadi.
Yillik aylanmasi 10 milliard so‘mdan oshgan korxonalar uchun amal qilayotgan avans to‘lov talabi endi faqat 20 milliard so‘mdan yuqori aylanmaga ega bo‘lganlarga tatbiq etiladi. Bu chora orqali 14 mingga yaqin tadbirkorga jami 1 trillion so‘mlik mablag‘ erkin qoladi.
1-noyabrgacha tadbirkorlar soliqdagi xatolarni mustaqil ravishda tuzatib, soliq reytingini “toza sahifadan” boshlash imkoniyatiga ega bo‘ladi. Ushbu imkoniyat soliq amnistiyasi orqali yaratilgan.
2026-yildan boshlab yer, mol-mulk, ijtimoiy va daromad solig‘i bo‘yicha hisobotlarni soliq organlari tayyorlab beradi. Tadbirkorlar esa besh kun ichida ularni ko‘rib chiqib, zarur tuzatishlarni kiritishi mumkin bo‘ladi.
Shuningdek, kichik biznes uchun jarimalar miqdori uch barobar kamaytiriladi. Manba: Kursiv.uz
