O‘zbekiston MDHda uran zahiralari bo‘yicha ikkinchi
O‘zbekiston Mustaqil Davlatlar Hamdo‘stligi (MDH) davlatlari orasida uran zahiralari bo‘yicha ikkinchi o‘rinni egallab turadi. Bu haqida Zamin.uz xabar berdi.
Bu haqda “Kursiv” nashri ma’lumot bergan. Jahon reytinglarida esa O‘zbekiston to‘qqizinchi o‘rinda joylashgan.
Mamlakatda uran qazib olish ekologik jihatdan xavfsiz hisoblangan yer osti yuvish texnologiyasi asosida amalga oshirilmoqda. Ushbu usul atrof-muhitga kam zarar yetkazadi va tabiiy resurslarni asrashga xizmat qiladi.
Hozirda O‘zbekistonda 23 ta uran koni faoliyat yuritmoqda, shuningdek, yana 10 ta obyektda geologik qidiruv ishlari davom etmoqda. “Uzatom” agentligining ma’lumotiga ko‘ra, 2025-yilda uran qazib olish hajmi taxminan 4200 tonnani tashkil etishi kutilmoqda.
Kelgusi yillarda esa bu ko‘rsatkich oshib, 2030-yilgacha 7200 tonnaga yetkazilishi rejalashtirilgan. Uran zaxiralari mamlakat iqtisodiyotining muhim qismi bo‘lib, uning tabiiy resurslardan oqilona foydalanish orqali yanada rivojlanishi kutilmoqda.
Manba: kursiv.uz
