Islom sivilizatsiyasida yong‘in, artefaktlar zarar ko‘rmadi
Islom sivilizatsiyasi markazida yuz bergan yong‘in natijasida hech qanday qimmatbaho artefakt zarar ko‘rmaganligi ma’lum qilindi. Bu haqida Zamin.uz xabar berdi.
Rasmiy bayonotga ko‘ra, muzey uchun mo‘ljallangan eksponatlar alohida binoda, yangi kompleksdan tashqarida joylashgan va doimiy nazorat hamda to‘liq xavfsizlik sharoitida saqlanmoqda. Yong‘in sodir bo‘lgan paytda binoda Kaaba qoplami va boshqa qimmatli eksponatlar mavjud emas edi.
Ijtimoiy tarmoqlarda 19-avgustdagi voqea vaqtida binoda odamlar bo‘lganligi va artefaktlarga zarar yetgani haqida tarqalgan xabarlar asossiz hisoblandi. Markaz rahbariyati bu da’volarni qat’iyan rad etdi.
Hozirda loyiha qurilish ishlari to‘liq yakunlanmagan bo‘lib, bosh pudratchi sifatida “Trest-12” kompaniyasi faoliyat yuritmoqda. Qurilish uchun mablag‘ hukumat huzuridagi maxsus direksiya tomonidan ajratilmoqda.
Shuningdek, loyihaga xorijiy kompaniyalar va dizaynerlar ham jalb qilingan. Ushbu ma’lumotlar Kursiv.uz sayti tomonidan taqdim etildi.
