Marketpleyslar soni 163 taga yetdi, QQS qaytariladi

So‘nggi uch yil ichida marketpleyslar soni 24 tadan 163 taga yetgani davlat rahbarining tadbirkorlar bilan uchrashuvida qayd etildi. Bu haqida Zamin.uz xabar berdi.

Prezident Shavkat Mirziyoyevning ta’kidlashicha, tadbirkorlar mahsulotlarini raqamli platformalar orqali eksport qilishni o‘rganib, milliy va xorijiy marketpleyslarda sotilgan mahsulotlar uchun an’anaviy eksportdagi kabi qo‘shilgan qiymat solig‘i (QQS)ni qaytarishni talab qilishmoqda. Davlat rahbari mas’ullarga bu jarayonni rasmiylashtirish va amaliyotga joriy etishni topshirdi.

Shuningdek, moliyaviy texnologiyalar sohasidagi startaplarni ko‘paytirish va ularni qo‘llab-quvvatlash bo‘yicha besh yillik strategiya ishlab chiqilishi rejalashtirilmoqda. “Ochiq banking” ekotizimi joriy etilib, u banklar, moliyaviy texnologiyalar kompaniyalari va startaplar o‘rtasida samarali hamkorlikni ta’minlaydi.

Kelgusi yillarda startap loyihalarga yo‘naltiriladigan investitsiyalar hajmi hozirgidan o‘n barobar oshirilishi ko‘zda tutilmoqda. Ushbu ma’lumotlar Uz24 saytidan olindi.