Yakkasaroy tumani, Salar ko‘chasida noqonuniy qurilish natijasida qo‘shni uylarda tuproq siljishi yuz berdi. Bu haqida Zamin.uz xabar berdi.
Ushbu holat mahalla ahlida katta tashvish uyg‘otdi. Noqonuniy qurilish tufayli yerda tuproq o‘pirilishi va siljishi kuzatilib, qo‘shni binolarning hovlisiga zarar yetdi.
Mahalla aholi vakillari o‘z xavfsizliklari uchun huquqni muhofaza qiluvchi organlarga murojaat qilishdi. Voqea Dilbuloq mahallasidagi ko‘p qavatli uylar hududida sodir bo‘ldi.
Qurilish inspeksiyasi ma’lumotiga ko‘ra, bu obyektning asosiy qismi “Lyuks Loyiha” mas’uliyati cheklangan jamiyati tomonidan tayyorlangan loyiha hujjatlari asosida qurilmoqda. Loyiha “Arxitektura va shaharsozlik kengashi” hamda “Shaharsozlik hujjatlari ekspertizasi” davlat unitar korxonasi tomonidan ijobiy baholangan.
A bloki Toshkent shahrining Qurilish va uy-joy kommunal xo‘jaligi sohasidagi hududiy nazorat inspeksiyasida rasmiy ro‘yxatdan o‘tgan. Ushbu inspeksiya tomonidan 10 martadan ortiq monitoring o‘tkazilib, 11 ta yozma ko‘rsatma berilgan.
Shu bilan birga, qurilish normalariga rioya qilinmagani uchun buyurtmachi ikki marta ma’muriy javobgarlikka tortilgan. Biroq G4 blok bilan bog‘liq vaziyat boshqacha.
Bu blok “Arxitektura va shaharsozlik kengashi”dan ijobiy xulosa olgan bo‘lsa-da, “Shaharsozlik hujjatlari ekspertizasi” DUKdan rasmiy hujjat olinmagan. Shu sababli G4 blok rasmiy ro‘yxatdan o‘tmagan va qurilish ishlari noqonuniy hisoblanadi.
Inspeksiya holat yuzasidan huquqni muhofaza qiluvchi organlarga ma’lumot bergan. Tekshiruv davomida ma’lum bo‘lishicha, buyurtmachi “O‘zkommaishiysavdo” MCHJ G4 blok uchun kotlovan qazish ishlarini olib borganida hududdagi elektr transformatorida nosozlik yuzaga kelgan.
Bu esa kotlovandagi suvlarni to‘liq chiqarishga imkon bermagan va suv darajasi ko‘tarilgan. Natijada “Grand Capital” MCHJ tomonidan ilgari qurilgan yerosti avtomashina turarjoyida tuproq siljishi yuzaga kelgan.
Bu holat yerda sirpanish va xavfli vaziyatlarning yuzaga kelishiga sabab bo‘lmoqda. Hozirda qurilish inspeksiyasi va boshqa tegishli organlar vaziyatni diqqat bilan nazorat qilishmoqda.
Mahalla aholisi esa bu voqea orqali shahardagi qurilish nazorati, qurilish normalariga rioya qilish va qo‘shnilar xavfsizligini ta’minlash masalalarida yanada hushyor bo‘lishlari lozimligini bildirmoqda. Manba: zamin.uz
