Korrupsiyaga qarshi kurashish agentligi xabariga ko‘ra, Uzbekistan Airports aksiyadorlik jamiyati tomonidan amalga oshirilgan 6,8 milliard so‘mlik davlat xaridi qonun hujjatlariga zid ravishda o‘tkazilgan. Bu haqida Zamin.uz xabar berdi.
Ushbu xarid bodi-kameralarni yetkazib berish, o‘rnatish va ishga tushirish xizmatlarini ko‘rsatish uchun tender shaklida tashkil etilgan edi. Ammo tanlov jarayonida bir qator qonun buzilishlari aniqlandi.
Ishtirokchilarning taqdim etgan hujjatlari to‘liq va adolatli baholanmadi, shuningdek, o‘zaro bog‘liq va manfaatdor kompaniyalar qatnashgani aniqlangan. Baholash paytida esa bir nechta xato va kamchiliklar yuzaga kelgani tasdiqlandi.
Korrupsiyaga qarshi kurashish agentligi ushbu holatlarni maxsus tahlil orqali o‘rganib chiqdi va natijada tender komissiyasining g‘olibni aniqlash bo‘yicha bayonnomalari bekor qilindi. Shu tariqa noqonuniy davlat xaridining oldi olindi.
Jarayon davomida yig‘ilgan barcha rasmiy hujjatlar huquqni muhofaza qiluvchi organlarga yuborilib, ularga huquqiy baho berilishi ta’minlandi (manba: zamin.uz).
