Poytaxtga noqonuniy yo‘l bilan olib kelingan yaroqsiz go‘sht musodara qilindi. Bu haqida Zamin.uz xabar berdi.
Ichki ishlar vazirligi ma’lumotlariga ko‘ra, Qashqadaryo viloyatidan Toshkentga 600 kilogrammdan ortiq go‘sht mahsuloti tegishli hujjatlarsiz va sanitariya qoidalariga zid ravishda tashilganligi aniqlangan. Ushbu go‘shtlar Cobalt rusumli avtomobil saloniga va yukxonasiga joylashtirilgan holda olib ketilgan.
Laboratoriya tekshiruvlari natijasida bu go‘sht iste’molga mutlaqo yaroqsiz ekani aniqlangan. Zararsizlantirish maqsadida mahsulotlar yoqib yuborilgan.
Shuningdek, joriy yilning o‘tgan davrida Jizzax viloyatida ham 1,5 tonnadan ortiq yaroqsiz go‘sht iste’molga chiqishining oldi olingan. Ushbu holat yuzasidan 29 yoshli haydovchiga Ma’muriy javobgarlik to‘g‘risidagi kodeksning tegishli moddalari asosida bayonnoma rasmiylashtirilib, unga 412 ming so‘m jarima jazosi tayinlangan.
Mutasaddi idoralar aholini go‘sht mahsulotlarini sotib olishda ehtiyotkor bo‘lishga chaqirmoqda. Xaridorlar har qanday go‘shtni sotib olishdan oldin sotuvchidan tibbiy daftarcha va veterinar xulosasini talab qilishi shart.
Chunki hujjatlarsiz sotilayotgan mahsulotlar iste’molchilar sog‘lig‘iga jiddiy xavf tug‘dirishi mumkin. Har bir fuqaro o‘zini va yaqinlarini himoya qilish uchun talabchan va diqqatli bo‘lishi zarur.
Manba: Ichki ishlar vazirligi.
