Samarqand va Buxoroga xalqaro avtosayohat boshlandi
“Orolga tashrif” xalqaro avtosayohat loyihasi doirasida ishtirokchilar tarixiy va madaniy boyliklari bilan mashhur bo‘lgan Samarqand va Buxoro viloyatlariga tashrif buyurdilar. Bu haqida Zamin.uz xabar berdi.
Ushbu avtosayohat O‘zbekiston Respublikasi Turizm qo‘mitasi tashabbusi bilan, SamAuto hamkorligi va Tegeta Motors kompaniyasining amaliy ko‘magida tashkil etilgan bo‘lib, mamlakatimiz turizm salohiyatini xalqaro miqyosda namoyon etishni maqsad qilgan. Sayyohlar Samarqandda Ulug‘bek rasadxonasi, Registon majmuasi va Shohizinda yodgorliklari bilan tanishdilar.
Buxoroda esa Poyi Kalon, Labi Hovuz va Ark qal’asi kabi tarixiy joylarni ziyorat qilishdi. Ular nafaqat me’moriy obidalar, balki mahalliy hunarmandchilik markazlari, kulolchilik, zargarlik va milliy ipakchilik faoliyati bilan ham yaqindan tanishish imkoniga ega bo‘ldilar.
Avtosayohatchilar mahalliy oshxonalarda o‘zbek milliy taomlaridan bahramand bo‘lib, cho‘zma palov, shurva, qurutob va somsa kabi an’anaviy taomlarni tatib ko‘rdilar. Shuningdek, ular o‘zbek xalqiga xos samimiylik va mehmondo‘stlik an’analariga guvoh bo‘ldilar.
Tashrif davomida ishtirokchilar o‘z taassurotlarini ijtimoiy tarmoqlar, shaxsiy bloglar va ommaviy axborot vositalari orqali real vaqt rejimida yoritib bordilar. Bu esa nafaqat Samarqand va Buxoro turizm salohiyatining keng targ‘ib etilishiga, balki O‘zbekistonning xalqaro turistik imijini mustahkamlashga xizmat qilmoqda.
Loyiha ishtirokchilari yaqin orada Orolbo‘yi mintaqasiga ham tashrif buyurishlari kutilmoqda. Bu esa ekologik va etnoturizm yo‘nalishlarini rivojlantirishda muhim qadam sifatida baholanmoqda.
Xalqaro avtosayohat orqali turizm sohasida hamkorlikni kengaytirish, madaniy aloqalarni mustahkamlash hamda O‘zbekistonning ijobiy obrazini jahon jamoatchiligiga yetkazish asosiy maqsad hisoblanadi. Manba: zamin.uz
