Iordaniya podshohi Abdulla II ibn al-Husaynning mamlakatimizga davlat tashrifi doirasida O‘zbekiston prezidenti Shavkat Mirziyoyev bilan birga mahalliy ishlab chiqarilgan eksportbop mahsulotlar ko‘rgazmasi bilan tanishdi. Bu haqida Zamin.uz xabar berdi.
Tadbir Samarqand shahridagi Kongress markazida bo‘lib o‘tdi. Ko‘rgazmada xorijiy bozorlar uchun xalqaro standartlarga javob beradigan keng turdagi yuqori sifatli mahsulotlar taqdim etildi.
Podshohga tog‘-kon, farmatsevtika, kimyo, to‘qimachilik, zargarlik sanoati, qishloq xo‘jaligi va axborot texnologiyalari sohalaridagi texnologik jarayonlar, ishlab chiqarish quvvatlari hamda innovatsion yechimlar haqida batafsil ma’lumot berildi. Ko‘rgazmada dori vositalari, tibbiy asbob-uskunalar, mineral o‘g‘itlar, trikotaj buyumlari, hunarmandchilik mahsulotlari va IT yechimlari kabi yuqori qo‘shilgan qiymatga ega tayyor sanoat mahsulotlari namoyish etildi.
Iordaniya podshohi O‘zbekiston mahsulotlari va sanoat salohiyatini yuqori baholadi. Davlat rahbarlari esa ikki tomonlama hamkorlikni rivojlantirish, yetakchi korxonalar o‘rtasida kooperatsiyani kengaytirish, tajriba almashish va texnologiyalar transferini yo‘lga qo‘yish zarurligini ta’kidladilar.
Ushbu tadbir mamlakatlar o‘rtasidagi iqtisodiy aloqalarni mustahkamlashda muhim ahamiyat kasb etadi. Manba: zamin.uz
