Mirziyoyev Yaponiya vaziri bilan hamkorlikni mustahkamladi

Prezident Shavkat Mirziyoyev 27 avgust kuni mamlakatimizda rasmiy tashrif bilan bo‘lib turgan Yaponiya tashqi ishlar vaziri Takeshi Ivaya boshchiligidagi delegatsiyani qabul qildi. Bu haqida Zamin.uz xabar berdi.

Uchrashuvda O‘zbekiston va Yaponiya o‘rtasidagi strategik sheriklik munosabatlarini yanada mustahkamlash hamda ko‘p qirrali hamkorlikni kengaytirish masalalari muhokama qilindi. Muloqotlar faol davom etayotgani va amaliy hamkorlikning jadal rivojlanayotgani alohida ta’kidlandi.

Bugungi uchrashuv ikki mamlakat tashqi ishlar vazirlarining birinchi Strategik muloqot yig‘ilishining samarali natijalarini ko‘rsatdi. Siyosiy muloqotni yanada chuqurlashtirish, savdo-iqtisodiy, investitsiyaviy, moliyaviy-texnik va madaniy-gumanitar sohalarda aniq loyihalarni ilgari surish ustuvor vazifa sifatida belgilandi.

Shuningdek, O‘zbekiston-Yaponiya markazining faoliyatini kengaytirish va uning negizida Yaponiyaning yetakchi universitetlari ishtirokida qo‘shma universitet tashkil etish rejalari qo‘llab-quvvatlandi. Uchrashuvda xalqaro va mintaqaviy ahamiyatga ega masalalar, jumladan «Markaziy Osiyo + Yaponiya» formatida bo‘lib o‘tadigan kelgusidagi sammitni o‘tkazish borasida ham fikr almashildi.

Manba: zamin.uz