Iordaniya podshohi Abdulla II ibn al-Husaynning O‘zbekistonga ilk davlat tashrifi doirasida ikki mamlakat o‘rtasida 15 ta muhim hujjat imzolandi. Bu haqida Zamin.uz xabar berdi.
Shuningdek, vizasiz rejim joriy etilishi haqida e’lon qilindi. Ushbu tashrif chog‘ida O‘zbekiston prezidenti Shavkat Mirziyoyev Iordaniya qirolligining eng yuksak mukofoti — «An-Nahda» ordeni bilan taqdirlandi.
Bu voqea O‘zbekiston tarixida muhim ahamiyatga ega ekanligi ta’kidlandi. O‘zbekiston musulmonlari idorasi raisi, muftiy shayx Nuriddin Xoliqnazar bu tashrif va mukofotning tarixiy ahamiyatini alohida qayd etdi.
Unga ko‘ra, bu orden yuksak e’tiborga sazovor shaxslarga beriladigan alomat hisoblanadi. Muftiy fikricha, ushbu voqea O‘zbekistonning jahon maydonida o‘z o‘rnini mustahkamlashining yorqin namunasidir.
Prezidentimizning uzoqni ko‘ra bilishi va siyosiy irodasi mamlakatimizning ichki va tashqi siyosatida tub islohotlarni amalga oshirishga zamin yaratdi. Shayx Nuriddin Xoliqnazar ta’kidlashicha, O‘zbekiston endi nafaqat qo‘shni davlatlar bilan, balki Yaqin Sharq va arab davlatlari bilan ham yangi bosqichda mustahkam aloqalar o‘rnatmoqda.
Iordaniya esa musulmon dunyosida o‘z nufuziga ega davlat sifatida O‘zbekiston uchun muhim hamkor hisoblanadi. Prezidentimizning arab davlatlari bilan munosabatlarni kengaytirishi, jumladan Birlashgan Arab Amirliklari va Saudiya Arabistoni bilan yaxshi aloqalar yo‘lga qo‘yilishi nafaqat iqtisodiy va siyosiy sohada, balki diniy va ma’naviy hamkorlikni ham rivojlantirmoqda.
Shu tariqa, Iordaniya podshohining O‘zbekistonga tashrifi ikki davlat munosabatlarini yanada mustahkamlab, mamlakatimizning xalqaro siyosatdagi nufuzini oshirishda muhim ahamiyat kasb etdi. Manba: zamin.uz
