Kuvaytlik tadbirkor Xorazmda hamkorlikni rivojlantirdi
Kuvaytning Dejavu for Juice kompaniyasi rahbari Ahmad al-Bag‘iliy Xorazm viloyatida o‘tkazilgan biznes-forum hamda “Qovun sayli” xalqaro festivalida ishtirok etdi. Bu haqida Zamin.uz xabar berdi.
Ushbu tadbir davomida mehmon mahalliy ishbilarmonlar bilan muloqot qilib, hamkorlikning amaliy yo‘nalishlarini muhokama qildi. Ahmad al-Bag‘iliy “Qovun sayli” festivali haqida gapirar ekan, ko‘plab xalqaro tadbirlarda qatnashganini, ammo aynan Xorazmda tashkil etilgan bu festival o‘ziga xos jozibadorlik va ruhga ega ekanligini ta’kidladi.
U madaniy an’ana, mahalliy pazandachilik va mehmondo‘stlik uyg‘unligi tadbirni noyob qilayotganini qayd etdi. Biznes-forum doirasida kuvaytlik tadbirkor o‘zbek ishbilarmonlari bilan B2B formatida uchrashuvlar o‘tkazdi.
Suhbatlarda o‘zaro hamkorlikning istiqbolli yo‘nalishlari — qayta ishlangan oziq-ovqat mahsulotlari, ichimliklar sanoati, savdo tarmoqlari va logistika masalalari muhokama qilindi. Shuningdek, Xorazmdagi Japan Uz Trade House va Khorezm Insulation Group kompaniyalari vakillari bilan alohida muzokaralar olib borildi.
Uchrashuvlarda O‘zbekistondan quruq va quritilgan mevalarni Kuvaytga eksport qilish masalalari atroflicha ko‘rib chiqildi. Tomonlar qulay transport va logistika yo‘nalishlarini belgilash, yetkazib berish muddatlari hamda sifat standartlarini muvofiqlashtirish, sertifikatlash va bojxona rasmiyatlarini optimallashtirish bo‘yicha ishchi guruhlar tuzish tashabbusini muhokama qildi.
Xorazmdagi biznes-forum va “Qovun sayli” xalqaro festivali Kuvayt bilan savdo-iqtisodiy aloqalarni yangi bosqichga olib chiqish uchun qulay maydon yaratdi. Ehtiyoj va takliflar aniqlandi, hamkorlikning amaliy qadamlari belgilandi, eksport va logistika sohasida dastlabki kelishuvlar muhokama qilindi.
Endi esa asosiy vazifa kelishuvlarni aniq loyihalarga aylantirish va qo‘shma tashabbuslarni amalga oshirishdan iborat. Manba: zamin.uz
