Toshkent maktablarida 10-11 sinflarga kuzatuv kamerasi o‘rnatiladi
Toshkent shahridagi barcha umumta’lim maktablarining 10 va 11-sinf xonalariga maxsus kuzatuv kameralari o‘rnatilishi belgilandi. Bu haqida Zamin.uz xabar berdi.
Bu chora orqali yuqori sinf o‘quvchilarining dars davomati, fanlarga bo‘lgan qiziqishi hamda ta’lim sifatini samarali nazorat qilish imkoniyati yaratiladi. Shuningdek, maktablarda “Smart School” elektron tizimi bosqichma-bosqich joriy qilinishi rejalashtirilmoqda.
Ushbu tizim yordamida sinflardagi o‘quvchilarning darsda ishtirok etish darajasi, ta’lim sifati va ularning psixologik holati sun’iy intellekt asosida aniqlanadi. Bundan tashqari, fanlarga qiziqish darajasi va o‘qituvchilarning pedagogik mahorati to‘g‘risida ham ma’lumot olish mumkin bo‘ladi.
Shahar hokimi qaroriga muvofiq, mazkur tashabbus yuqori sinflarda ta’lim sifatini oshirish va o‘quvchilarning davomatini kuchaytirish maqsadida amalga oshiriladi. Kameralar har bir tuman mahalliy budjeti hisobidan o‘rnatiladi.
Eslatib o‘tamiz, ilgari Olmazor tumanida tajriba sifatida 31 ta umumta’lim maktabidagi 250 ta sinfxona “Smart School” dasturi bilan jihozlangan edi. Sinov natijasida ushbu tizim ta’lim jarayonini nazorat qilish, o‘quvchilar davomatini hisobga olish va fanlarga qiziqishni tahlil qilishda yuqori samaradorlik ko‘rsatdi.
Mutasaddilarning fikricha, loyiha butun Toshkent shahridagi maktablarda amalga oshirilsa, ta’lim sifatini oshirishda muhim qadam bo‘ladi. Shu bilan birga, o‘quvchilarning intizomini mustahkamlash va bilim olishga bo‘lgan qiziqishini oshirishga xizmat qiladi (manba: zamin.uz).
