O‘zbekistonlik yoshlar dunyoda 2000 dan ortiq ta’lim olmoqda
Hozirgi kunda dunyoning eng nufuzli universitetlarida ikki mingdan ortiq o‘zbekistonlik yoshlar tahsil olmoqda. Bu haqida Zamin.uz xabar berdi.
Bu haqda O‘zbekiston mustaqilligining 34 yilligiga bag‘ishlangan tadbirda davlat rahbari Shavkat Mirziyoyev ma’lum qildi. Prezident matbuot xizmatining xabariga ko‘ra, ulardan 750 nafari “El-yurt umidi” jamg‘armasi orqali davlat tomonidan moliyaviy qo‘llab-quvvatlanib, xorijdagi oliy ta’lim muassasalarida o‘qimoqda.
Shavkat Mirziyoyevning ta’kidlashicha, o‘tgan yili o‘zbekistonlik yoshlar Markaziy Osiyoda top-500 talik eng yaxshi universitetlarga kirish bo‘yicha birinchi o‘rinni egalladi. Bu natija butun xalq uchun katta quvonch manbai bo‘ldi.
Ayniqsa, farzandlari dunyoning eng nufuzli oliygohlarida tahsil olayotgan ota-onalarning xursandligi ta’riflab bo‘lmasdir. Davlat rahbari prezidentlikka saylanganidan so‘ng sakkiz yil ichida respublikada oliy ta’limdagi qamrov 9 foizdan 42 foizga oshganini ta’kidladi.
Shu davrda maktabgacha ta’lim muassasalaridagi o‘rinlar 2,5 millionga ko‘paydi va qamrov 78 foizga yetdi. Yangi maktablar qurilishi hamda mavjudlarini kengaytirish orqali yana 1 million o‘quvchi uchun sharoit yaratildi.
“El-yurt umidi” jamg‘armasi 2018-yil sentyabr oyida prezident farmoni asosida tashkil etilgan. Ushbu jamg‘arma o‘zbekistonlik yoshlarni xorijdagi eng nufuzli ta’lim va ilmiy muassasalarda bakalavriat, magistratura va doktorantura bosqichlarida o‘qishini moliyaviy qo‘llab-quvvatlaydi.
Shuningdek, xorijda ta’lim olgan mutaxassislarni mamlakatda munosib ish bilan ta’minlashda yordam beradi. Jamg‘armaning asosiy vazifalaridan biri kadrlarning mehnat faoliyatini monitoring qilish va ularning kasbiy rivojlanishi hamda mansab yo‘lini qo‘llab-quvvatlashdir.
Bu esa mamlakatning intellektual salohiyatini oshirish va taraqqiyotga hissa qo‘shishga xizmat qiladi. 2025-yilda “El-yurt umidi” jamg‘armasi uchun davlat budjetidan 600 milliard so‘m ajratilgan.
Bu mablag‘ 2026-yilda 800 milliard so‘mga, 2027-yilda 950 milliard so‘mga, 2028-yilda esa 1 trillion so‘mgacha oshirilishi rejalashtirilgan. Ushbu moliyaviy qo‘llab-quvvatlash yoshlarning dunyoning eng nufuzli oliygohlarida ta’lim olish imkoniyatlarini kengaytiradi.
(Manba: zamin.uz)
