Rossiya O‘zbekistonda bir vaqtning o‘zida ikki atom elektr stansiyasini qurish loyihasini amalga oshirishni rejalashtirmoqda. Bu haqida Zamin.uz xabar berdi.
Bu haqda Rossiya Tashqi ishlar vaziri o‘rinbosari Sergey Ryabkov O‘zbekiston mustaqilligining 34 yilligi munosabati bilan Rossiyadagi O‘zbekiston elchixonasida o‘tkazilgan tadbirda ma’lum qildi. Uning so‘zlariga ko‘ra, bu loyiha Markaziy Osiyoda atom energetikasi sohasida birinchi marta amalga oshiriladigan murakkab va muhim tashabbus hisoblanadi.
Reja bo‘yicha bir stansiya katta quvvatga ega bo‘lib, ikkinchisi kichikroq hajmda quriladi. Bu ikki turdagi AES Markaziy Osiyo mintaqasida ilk mijoz loyihasi sifatida e’tirof etilmoqda.
Hozirda Rossiya va O‘zbekiston tomonlari loyiha texnik va moliyaviy jihatlarini muhokama qilmoqda. Qurilish jarayoni bosqichma-bosqich amalga oshiriladi, har bir stansiyaning quvvati va texnologik imkoniyatlari optimal darajada ta’minlanishi rejalashtirilgan.
Shuningdek, mahalliylashtirish darajasi yuqori bo‘lishi uchun ham alohida e’tibor qaratilmoqda. “Rosatom” rahbari Aleksey Lixachyov aprel oyida bergan intervyusida kichik AES qurilishi doirasida bir yil ichida beton quyilish ishlari boshlanishini bildirgan.
Katta AES bo‘yicha esa moliyaviy model, tashkiliy masalalar va mahalliy ishlab chiqarishni keng qo‘llash imkoniyatlari bo‘yicha tayyor takliflar mavjudligi aytilgan. Kichik AES O‘zbekistonda Rossiyaning xorijdagi birinchi eksport loyihasi hisoblanadi.
Ikkala davlat o‘tgan yil bahorida kelishuvga erishgan, kuzda esa texnik hujjatlar va loyiha ishlarini boshlash to‘g‘risida protokol imzolangan. Oldingi rejalarga ko‘ra, har bir stansiya 55 megavatt quvvatga ega olti reaktordan tashkil topadi.
Qurilish ishlari joriy yil yozida boshlanishi, stansiyalar esa bosqichma-bosqich 2029–2033 yillar oralig‘ida ishga tushirilishi ko‘zda tutilgan. Shu bilan birga, “Rosatom” rahbarining ma’lum qilishicha, loyiha moliyalashtirilishi O‘zbekiston tomoniga yuklanadi va hozircha Rossiya krediti ko‘rib chiqilmayapti.
Ryabkovning ta’kidlashicha, atom elektr stansiyalarining qurilishi O‘zbekistonga zamonaviy texnologiyalarni jalb qilish va energiya sohasida katta imkoniyatlar yaratadi. Bu loyiha mamlakat energetika tizimini mustahkamlash bilan birga, O‘zbekistonning xalqaro maydondagi investitsiyaviy va texnologik obro‘sini oshirishga xizmat qiladi.
Markaziy Osiyoda birinchi marta amalga oshirilayotgan ushbu AES qurilishi mintaqada yadro energetikasi sohasida yangi davrni boshlab beradi (manba: zamin.uz).
