Toshkentda yangi tungi avtobuslar yo‘lga qo‘yiladi
Toshkent shahar hokimligi poytaxtda turizm yo‘nalishlarini birlashtiruvchi yangi tungi transport tizimini joriy etishini ma’lum qildi. Bu haqida Zamin.uz xabar berdi.
Ushbu tizim doirasida soat 22:00 dan ertalab 06:00 gacha maxsus tungi avtobuslar qatnaydi. Bu avtobuslar orqali yo‘lovchilar aeroport, temiryo‘l vokzali, metro bekatlari, yirik bozorlar, savdo markazlari hamda talabalar yotoqxonalariga qulay tarzda yetib borish imkoniyatiga ega bo‘ladi.
Dastlabki bosqichda 15 ta yo‘nalish ishga tushiriladi va avtobuslar har yarim soatda harakatlanadi. Maxsus yo‘nalishlarda qatnaydigan avtobuslar qizil rangda bo‘yaladi hamda “T1”, “T2” kabi raqamlar bilan belgilanadi.
Bu ularni oddiy transport vositalaridan ajratib ko‘rsatishga yordam beradi. Avtobuslar zamonaviy talablar asosida jihozlangan bo‘lib, salonlarda konditsioner va bepul Wi-Fi mavjud.
Shuningdek, videokuzatuv tizimi o‘rnatilib, imkoniyati cheklangan yo‘lovchilar uchun maxsus qulayliklar yaratiladi. Yo‘lkira esa odatdagi avtobus narxidan farq qilmaydi.
Poytaxt transport boshqarmasi vakili Olloyor Norbutayevning so‘zlariga ko‘ra, loyiha ikki bosqichda amalga oshiriladi va jami 54 ta avtobus yo‘lovchilarga xizmat ko‘rsatadi. Dastlabki yillarda xarajatlar mahalliy budjetdan qoplanadi, taxminan 33 milliard so‘m sarflanishi kutilmoqda.
Hokimiyat bu tizimdan ko‘proq daromad olish emas, balki aholiga qulaylik yaratish maqsadida foydalanilishini ta’kidladi. Mutaxassislarning fikricha, poytaxtda turizm oqimini oshirish va transport infratuzilmasini rivojlantirish uchun bunday tashabbuslar muhim ahamiyatga ega.
Yo‘lovchilar uchun kechasi xavfsiz va qulay harakatlanish imkoniyatining yaratilishi shahar nufuzini yanada oshiradi. Manba: zamin.uz
