Toshkent maktablarida 10-11-sinflar nazorat qilinadi
Toshkent shahridagi barcha umumta’lim maktablarida 10 va 11-sinf o‘quvchilarini nazorat qilish maqsadida maxsus videokameralar o‘rnatiladi. Bu haqida Zamin.uz xabar berdi.
Bu haqda shahar hokimi Shavkat Umurzoqov tomonidan 29 avgust kuni qabul qilingan qarorda ma’lum qilingan. Qarorga ko‘ra, dastlab “Smart School” elektron tizimi Olmazor tumanida sinov tariqasida joriy etiladi.
Mazkur tizim doirasida 31 ta maktabning 250 ta sinfi yangi tartibda ishlaydi. Maxsus kameralar yordamida 10 va 11-sinf o‘quvchilari ta’lim jarayonida doimiy nazorat qilinadi.
Shuningdek, o‘quvchilarning darsga qatnashuvi va ruhiy holati sun’iy intellekt orqali tahlil qilinadi. Bundan tashqari, o‘quvchilarning fanlarga bo‘lgan qiziqishi hamda o‘qituvchilarning kasbiy malakasi baholanadi.
Ushbu loyiha mahalliy budjet hisobidan moliyalashtiriladi. Bu chora-tadbirlar Toshkent shahridagi yuqori sinflarda ta’lim sifatini oshirish va nazorat tizimini yanada mustahkamlashga qaratilgan.
Manba: zamin.uz
