Toshkent shahrida arzonlashtirilgan yarmarkalarda narx-navoning shaffofligi va adolatliligi ta’minlanishi uchun qo‘shimcha choralar ko‘rilmoqda. Bu haqida Zamin.uz xabar berdi.
Bu haqda Toshkent shahar hokimligi matbuot xizmati ma’lum qildi. Hokimlik hamda Iqtisodiy jinoyatlarga qarshi kurashish departamenti tashabbusi bilan aholiga qulaylik yaratish va turli iste’mol mahsulotlarini arzon narxlarda sotish maqsadida maxsus savdo yarmarkalari tashkil etilgan edi.
So‘nggi paytlarda ijtimoiy tarmoqlarda ayrim rastalarda rasmiy belgilangan narxdan yuqori narxlarda savdo qilinayotgani haqida shikoyatlar ko‘paydi. Bu holat fuqarolarning noroziligiga sabab bo‘ldi.
Shu sababli narxlarni sun’iy ravishda oshirishning oldini olish va shaffoflikni ta’minlash uchun qo‘shimcha nazorat choralariga kirishildi. Jumladan, arzon mahsulotlar sotiladigan rastalarda kuzatuv kameralari o‘rnatish ishlari boshlandi.
Hozirgacha Mirobod dehqon bozori va “Eski Juva” (Chorsu) bozorida kuzatuv kameralari o‘rnatildi. Tez orada poytaxtning boshqa yirik bozorlarida ham shunday texnik nazorat tizimi yo‘lga qo‘yilishi rejalashtirilgan.
Mutasaddilar ta’kidlaganidek, ushbu choralar orqali aholiga haqiqiy arzon mahsulotlardan foydalanish imkoniyati yaratiladi va savdo jarayonida adolat hamda shaffoflik ta’minlanadi (manba: Toshkent shahar hokimligi matbuot xizmati).
