Iqtidorli yoshlar oliyga to‘g‘ridan qabul qilinadi
O‘zbekistonda ta’lim sohasida yangi islohot joriy etilmoqda. Bu haqida Zamin.uz xabar berdi.
Prezident Shavkat Mirziyoyev 9 sentyabr kuni o‘tkazilgan videoselektor yig‘ilishida maktabni yuqori baholar bilan tamomlagan iqtidorli yoshlar ayrim oliy ta’lim muassasalarining ikkinchi kursiga to‘g‘ridan-to‘g‘ri qabul qilinishini ma’lum qildi. Oldin talabalar oliygohning birinchi kursiga kirib, keyinchalik o‘qishni davom ettirardi.
Endi esa bilim va tajribasi yuqori bo‘lgan bitiruvchilar vaqtni tejab, to‘g‘ridan-to‘g‘ri ikkinchi kursdan o‘qishni boshlash imkoniga ega bo‘ladi. Bu tizim iqtidorli yoshlarni qo‘llab-quvvatlash va ularning salohiyatini amaliyotda ro‘yobga chiqarishga xizmat qiladi.
Shuningdek, maxsus filial maktablar tashkil etilishi rejalashtirilgan. Axborot texnologiyalari sohasida Al-Xorazmiy maktablari, muhandislik yo‘nalishida Mirzo Ulug‘bek maktablari, tabiiy fanlarda esa Ibn Sino maktablari faoliyat yuritadi.
Bu maktablar hududlardagi texnika oliygohlariga nomma-nom biriktiriladi. Natijada o‘quvchilarning oliy ta’limga kirishi tizimli va manzilli bo‘ladi.
Bundan tashqari, 2026 yilda maktab o‘quvchilari o‘rtasidagi eng nufuzli xalqaro kimyo va informatika olimpiadalari ilk bor Markaziy Osiyo davlatlari ichida aynan O‘zbekistonda o‘tkaziladi. Ushbu tadbirni yuqori saviyada tashkil etish vazifasi Bosh vazirga topshirilgan.
Bu O‘zbekistonning xalqaro nufuzini oshirish bilan birga, yoshlar uchun katta rag‘bat bo‘lishi kutilmoqda. Manba: kursiv.media.
